حيرة طفل ابوه علماني !! (قصة)

[وآقعي]

اهلا بالجميع ..

يسعد لي اوقات الجميع ..
اولاً وقبل ان ابدأ بكتابة اول محاولة لي في كتابة القصة .. اتمنى ان تتسع صدوركم لقراءة ماكتبت منتظراً توجيهاتكم ونقدكم بكل رحابة صدر .

أنا لست بكاتب وانتم لستم بنقاد .. ولكن برؤيتكم لمواطن الخلل والقصور والتميز سنبرز هذين الجانبين فينا ..

اتضح لي مؤخراً ان هناك الكثير ممن يحب القصة القصيرة ومع ذلك لايوجد بنادي القلم اي قصة بقلم كاتبها .. فخيل لي ان يكون هذا الشي نتاج تردد من البعض (هو تخيل لايعني الصحة) .. او خوفاً من خوض مثل هذا الامر .. ولذا فضلت ان تكون البداية مني .. فحتى لولم تكون بدايتي موفقه فعلى الاقل هي دعوه لكتابة القصة القصيرة ..

عموماً لن اطيل عليكم فان حضيت بتجاوبكم معي سنناقش اموراً كثيره في كيفية جعل القصة القصيرة ضمن اهتمامات نادي القلم فعلياً وسنناقش ما اخطأت فيه وكيفية تعديله لاسيما وان هناك الكثير من الاخوان والاخوات يفضلون كتابة القصة القصيرة وقراءتها ..

ردي القادم سيتضمن محاولتي الأولى .. وساضعها في اجزاء خلف بعض ..

[وآقعي]

الجزء الأول ..

دخل الكاتب الكبير صاحب الاسم المشهور الدكتور فهد لمنزلة بعد عناء يوم جامعي أرهقته فيه تساؤلات واحتجاجات ومعارضة واشادة طلابه الذي كان يتقبلها دائما بصدر رحب فهو عينة رائعة قل أن نجدها في دكاترة وأساتذة بعض الجامعات الذي يغريهم حرف الدال والمكانة الاجتماعية التي هم فيها ..

وقبل ان يبدل الدكتور فهد ملابسة .. هذا هو ابنة الصغير محمد ينادية : بابا الهاتف لك ..
د. فهد : مين وأنا أبوك
محمد : واحد يقول من دار النشر
د. فهد : هلا هلا .. ايوه نعم .. لا كيف .. طيب خلاص ..بالنسبة لي ضروري ينزل كتابي هذا قبل الندوة بأسبوع على الأقل ..طيب خلاص اتفقنا .. مع السلامة ..
.. بسرعة يا ساره ترانا متنا جوع .. بعدين انا طالع لمشوار قبل اطلع المكتب ..
ساره : وش عندك ما قلت انك بتودينا أمي علشان تبارك لها بزواج أختي ..
فهد : خلاص طيب .. بس جهزتي اللي قلت لك عليه ..
ساره : وانت وش قايلي عليه ذكرني تراي هاليومين انسى حتى نفسي
فهد : ماشاءالله أمداك تنسين .. الملابس حقت المساكين بوصلها على طريقنا
ساره : أيه مجهزتها ..

وبعد الغداء .. اخذ فهد زوجته وابنة محمد الذي تعدا العقد الأول بثلاث سنوات وعلى طريقهم لأم ساره مروا على بيوت احد المساكين الذين لاينقطع عنهم ابو محمد (د.فهد) كل فتره وفتره ..

فهد : تعال انزل معي يا محمد .. صحيح المفروض أن اليد اليسرى ما تشوف اللي تقدمه اليد اليمنى بس أنا أبيك تحس بشعور هالمساكين وفرحتهم لما تقدم لهم حاجة وحتى لاسمح الله صار لي شي أنك ما تقطع عنهم هالعادة ..

وبعد ان انته فهد من واجبه الانساني .. اتجه لبيت خالته ام ساره ..

محمد : بابا بابا شوف هذا المسجد اللي اصلي فيه لاجيت عند جدتي .
فهد: ماشاءالله عند جدتك تركض للمسجد وانا لا دورتك تروح معي ما القاك ..
وصلوا لبيت ام ساره وسلم وبارك فهد وطلع لمكتبة الخاص ..

سكرتير فهد : هذا يابو محمد قصاصات جمعتها من صحف ومجلات تتكلم عن كتبك وخاصة الاخير وهذا يشيد وهذا يابو محمد ماش شكله ما أعجبته كتاباتك .. ماعليش في اللفظ يابو محمد يعني بصراحة مشرشحك ومطلعك ابو العلمانية
فهد : والله يا خالد مليت من سماع هالكلمة لدرجة أنها ما عاد تأثر فيني .. أنت لو قريت الموضوع اللي أرسله لي أبو سعد على الايميل كان ما استغربت ..
السكرتير خالد: وش كاتبين بعد يابو محمد !!؟؟
فهد : يقولون يا خالد انك بنت ..
السكرتير خالد: وش هالحكي يابو محمد وأنا وش دخلني يجيبون طاريي بعد ..
فهد : لا هم ما يقصدون هالمعنى اللي وصلك .. يقولون وش ترجون في كاتباً يدعوا للسعودة وهو حاطاً سكرتيرة لبنانية .. انت هندي ياخالد ولا سعودي . انت لبنانية ولا لبناني قصدي سعودي ..
السكرتير خالد : اه يابو محمد اذا بتـ... ترن ترن ترن
فهد : رد رد على التلفون وخلك منهم ..
السكرتير خالد: هذا عيالك يابو محمد .
فهد : هلا ساره .. ايه ليش تو الناس .. خلاص خلاص طيب ساعة وامر آخذكم .. حتى أنا ما عاد لي نفس اكتب شي ولا اسوي شي .. لا لا مافية شي .. اقولك بعدين .. مع السلامة جايكم .
خالد: شكلك ماشي يابو محمد ..
فهد : ايه رايح أن بغيت شي تلاقيني على الجوال . سلام ..
ومر ابو محمد عياله عند أهلهم واخذهم متجهين لمنزلهم عند الساعة التاسعة مساءاً ..
فهد : وش في الحميدي ساكت مهيب العادة ..
محمد : بابا وش العلماني ؟
فهد : كيف !!!!!!!!!!!!!!!!!!!!!!!!!!!!!! ! وأنت وين سمعت هالكلمة ..
محمد : انا قريتها على الإنترنت وخالتي حنان توري امي اللي كاتبين فيك في الإنترنت ..

فهد: ماشاءالله انا توي ادري ان خالتك عندها انترنت .. دخلت على موقع مجلة ماجد ولا بس مزعجني لاجيت اشتغل في البيت ..
محمد : لا ما دخلته نسيت أقول لخالتي تطلعه لي ..
وبعد ان وصلوا للبيت وتعشى الجميع ونام محمد .. ودخل فهد وساره لغرفتهم ..
فهد : ساره كيف تسمحين لمحمد وفي هالعمر انه يطالع مثل هالمواضيع في الإنترنت ..
ساره : ماجاء في بالي بصراحة .. كانت حنان تطالعني على كلام عنك وماحسيت فيه وهو يقرأ معنا .. ولا جاء في بالي أصلا أني امنعه ما ادري ليه فاتني هالشي ..
فهد : انا ما أقول هالشي لانه قرأ كلام ماله من الصحة شي عني .. بس انتي عارفة الإنترنت والبلاوي اللي فيه .. أمور كثيره فيه ممكن تغسل عقل الغير مدرك وسريع التأثر فتغيره وتخليه في حيره بسبب توجهات ناس غير مدركة احياناً كثيره للي قاعدين يسوونه وبعضهم هالشي له هدف وبعـ ..
ساره : اقول لا تنسيني بس .. أنت وش فيك اليوم تقول مالي حتى نفس اكتب .. وأنت رايح وشكلك يقول انك بتكتب كتابين مو مقال ..
فهد : كله منك
ساره : مني أنا وأنا كنت معك في المكتب وبعدين وش دخلني أنا ؟؟!!!!!
فهد: لا .. بس تذكرتك ..
ساره : يا سلام يعني أنا أسد النفس .. ما وصلك هالمواصيل الا انا .. مو يقولو وراء كل رجلاً عظيم امرأة ..
فهد: هههههههههههه يامصبراني أنتي .. لا بس ما ادري ليه وعلى فكره غريب هالأحساس اللي جاني قبل ما يسأل محمد عن العلمانية .. فكرت فيك وقلت يمكن اني بكتاباتي مسبب لك حرج ماعمري سألت عنه .. قلت يمكن احد يضايقك بكلمة او لمزه ..
ساره : تبي الصدق يا فهد وصلني كلام كثير لكن عمري ماخذته غير استهتار بها لعقول اللي تطلق الأحكام وتفسر على كيفها وتشكك في دين ناس بعد على كيفها .. تدري عاد وش السبب اللي خلى محمد يشوف المكتوب عنك ..
فهد : وش السبب ؟؟
ساره : اختي حنان تمزح معي تقول تعالي شوفي وش كاتبين عن زوجك العلماني ..
فهد : هاهاي حتى أنتي يا حنان
ساره : لا طبعا هي تمزح ..
فهد : ايه يالله يا عارفا بالنوايا وما تخفي الصدور .. انك عالما بنهجي وبالتزامي ومقاصد ما اكتب .. خلينا ننام احسن .. تصبحين على خير ..
ساره : وأنت من أهل الخير ..

وفي صباح اليوم التالي وفي مدرسة محمد ..

يتبع جزء ثاني ..

[وآقعي]

الجزء الثاني..

محمد : استاذ .. وش معناة علماني ..
الأستاذ: ايه الله يهدى أبوك اللي شكلة بيرسخ فيك حتى مبادئه .. العلمانية معناها كبير يامحمد وش لك فيها ..
محمد: لا يا أستاذ بس أنا متحدي ولد خالي أنا أقول معناها زين وهو يقول لا معناها شين ..
الأستاذ: نحتاج اليوم كله يا محمد علشان اشرحها لك .. لكن هي باختصار (فصل الدين عن كل أمور الدنيا)
محمد : يعني يا استاذ معناها شين ..
الأستاذ: ايه معناها شين لا تشغل راسك في هالامور ..
وانتهى اليوم الدراسي وعاد محمد وعادت ساره وفهد من أعمالهم .. وفي زحمة هموم فهد دخل بسرعة ألقى السلام حتى ما طالع في الوجوه .. ولو كان طالع في الوجوه كان شاف نظرات عمره ما شافها في محمد اتجاهه . نظرات غريبة مابين حيره وتصديق وعدم فهم .. فكل هذه النظره فقط لانه عرف أن معناها شين .. ولأن هالمعنى وصف به ابوه .. لكن محمد مازال غير عارف لمعناها الشامل . ومازال معنى هذه العلمانية يدور في ذهنه .. وبين حيرته وبين تردده في تكرار السؤال على ابوه .. وجد نفسه يحيل السؤال لأمة ..
محمد : ماما صحيح العلمانية معناها شين ..
ساره : وأنت وش دراك أن معناها شين ..
محمد : يعني معناها شين ياماما
ساره : وأنت ليه تبي تعرف معناها ..
محمد: لان صديقي مره قالي ان ابوه يقول له لاتماشي محمد أبوه علماني !!!!!!!!!!!
ساره : وشو وش هالكلام .. وأنت تصدق كل شي على أبوك ..
وبسبب تفاجأ ساره بان الامر اكبر من قراءة محمد لهذه الكلمة عن ابوه في الانترنت .. أخطأت في معالجة الأمر وأهملت التوضيح أو الإجابة او إزالة هذا المعنى الشي الذي توقعه محمد في أبوه وهو الذي لا يعرف اكثر من أن هذه الكلمة شينه .
وتركت ساره محمد في حيرته وانشغلت بما كانت تعمله وهي تفكر في هذا الأمر قبل ان تتجه بعده سريعا لفهد لتقص له ما حصل ..
فهد بلغة لاينقصها الغضب: طيب ليه ماعلمتيه معنى العلمانية الحقيقي .. وناقشتي واخذتي واعطيتي معه .. من متى ياساره وحنا نكذب ونتهرب مع ومن محمد .. وانا حتى وان كنت تهربت من الإجابة على محمد في السيارة يومها .. الا لأني قلت كلمة قراها وراح ينساها اما انها تكون حيره وتفكير له وهاجس ويسأل الآخرين وحنا نعلم الآخرين ونترك ابننا في حيره فهذا اعتبره سقوط وفشل لي ولك وامانة خناها مع محمد .. كان المفروض لما سألك جاوبتيه بكل صراحة وش خايفه منه انتي .. خايفه تتغير صورتي اتجاهه .. او يمكن لأنك شاكة اني بعد علماني و
ساره : بس بس بس يا فهد حرام عليك تشك فيني أنى ممكن أفكر ولو للحظة ان فيك كلمة وحده من هاللي يقولونها .. كل مافي الموضوع أنى من اساسه ما ادري وش هالعلمانية الله لايبارك فيها كل اللي اعرفها او سمعتهم يقولون عنها انها الحاد تبيني اقول لولدك انك ملحد انك ما تؤمن بالله ولا معترف بكل تشريعاته .. أقوله حاجات حسب فهمي وتطلع خطأ .. انا جايتك ابيك تعالج الموضوع ماجيتك علشان ااكد هالشي فيك ولا علشان تعتقد فيني اني ممكن اصدق فيك كلمة وحده يافهد ..
وطبعا مع هالصراخ اللي ما تعوده الجميع سمع محمد اغلب الكلام لكن المشكلة أن اغلب ما رن في أذن محمد ودخل عقله لانه ابهره هي كلمة امه في نقاشه مع ابوه وهي تقول له تبيني أقوله انك ملحد وما تؤمن بالله وتشريعاته وعند هالنقطة كان كافي محمد انه يهرب لغرفته غير مصدق ومبهور .. فهذا كافي لأن يجيب على تساؤلاته الأخرى ليه اب صديقه قاله لاتماشي ولد الدكتور فهد .. وليه الكلام اللي كان في الانترنت ضد ابوه .. وليه قاله الأستاذ ليه ابوك يدخلك في هالامور وانها كلمة شينه .. وليه ابوه ماجاوب على هالسؤال وتهرب .. وهذه هي المشاكل تبدأ بأخطاء غير مقصوده .. تبدأ بخطاءنا في كيفية معالجة الأمور ..
وبعد تفكير ليس بطويل من الدكتور فهد ..
فهد :اذكري الله يا ساره و سوي الشاي ونادي محمد وتعالو للمكتب .. (مكتب فهد داخل البيت)
ساره : وش فيك يا محمد تصيح خير إنشاء الله .. قم روح شوف أبوك ينتظرك في المكتب ..
محمد : مابي أروح ..
ساره : ليه ماتبي تروح .. شف وش يبغى أبوك حبيبي قوم غسل وجهك وروح اقعد مع أبوك في المكتب ..
وبتثاقل غسل محمد وجهه واتجه للمكتب ..

يتبع الجزء الاخير ..

[وآقعي]

الجزء الاخير

فهد : وش فيك يا محمد زعلان ..
محمد : بابا أنت علماني
فهد : لا منيب عماني ..
محمد : علماااااني ..
فهد : لا منيب علماااااني ..
في هاللحظة دخلت ساره للمكتب وفي يدها الشاي وجلست على الصوفه اللي فيها فهد ومحمد ثلاثة بجانب بعض .. قام فهد وجلًس محمد مكانه بجانب امه على الصوفه وجلس هو على كرسي المكتب وشغل الجهاز واتصل بشبكة الإنترنت ودخل على أيميله بعد ان فتح اثنين ثلاثة من المواقع .
فهد : قبل ما أبدا أوضح لك يا محمد وأنتي ياساره ليه أنا جبتكم هنا انا زعلان منك يا محمد
محمد : ليه يا بابا أنا ما سويت شي !!!!
فهد: أستاذك يقول انك ضارب زميلك اليوم في الفصل ولا جبت كراسة الرياضيات .
محمد : والله ما ضربت احد وبعدين اليوم ماكان عندنا رياضيات ليه أجيبها ..
فهد: يعني أستاذك بيكذب ؟؟
محمد: ايه كذاب هو
فهد: طيب أستاذك كذاب .. برضه أبو زميلك كذاب ؟؟
محمد: أنا ما ضربت يا بابا أحد بعدين أبو مين اللي قال لك هالكلام ؟؟
فهد : مو مهم من قال لي هالكلام المهم انهم يكذبون ولا صادقين أنا ما اصدق الا أنت يا محمد ..
محمد: ايه يابابا يكذبون .. انت تعرفني ماعمري ضربت احد
فهد : خلاص انا مصدقك حتى يوم قالو كلامهم لي قلت لهم ولدي محمد عمره ما يسوي هالشي .
شوف يامحمد وشوفي ياساره .. انا مايعجزني شرح مصطلح او كلمة وأنا اللي الحين كتبي وارائي صارت تدرس .. لكني احب أن اشرح لكم هالكلمة اللي سألته عنها يا محمد من الإنترنت لانك قريتها عني من الانترنت .. وصدقت الانترنت وبما انك تثق فيه راح اشرحها من المصدر اللي انت تثق فيه ..
شوفوا هالموقع يتكلم عن العلمانية .. وراح اشرح لك يا محمد تبسيط عن العلمانية وابيك تقارن بين معناها وبين اللي أنا أقوم به واللي أنت تعرفه عني .. خلاص يا محمد . تعال أقرا الحين وأنا بشرح لك يا محمد ..
معنى الكلام اللي انت قريته الحين ان الحياة مفصولة عن الدين .. يعني تصرفاتنا وشئونا وأفكارنا شي والدين شي ثاني وعلشان أوضح لك اكثر يقصدون ان الدين ما يحكمنا ويوجهنا في السياسة ولا في حياتنا الاجتماعية ولا في حياتنا الاقتصادية .. ويقصدون ان الدين والعلم ما يجتمعون وهم ضد بعض .. أنت فهمت وأنا أبوك ولا تهز الراس وانت مانت فاهم ..
محمد : لا مافهمت يابابا
فهد : وانتي ياساره
ساره : هذا كله مايهمني لاني لو ابي اعرفه عرفته بس انا افكر وش يدور في راسك .
فهد : شف يامحمد يعني باختصار العلمانية والعلمانيين ماهم معترفين والعياذ بالله ان الدين هو اللي ينظم كل مافي هالحياة .. يعني يتصرفون بكيفهم ماكأن فيه فوقهم الله يراقبهم .. يعني وانا بوك بعضهم يصلي او يتعبد وكلا وديانته .. بعدين يروح للسوق اللي يغش واللي يسرق واللي يكذب واللي يروح لاماكن شينه ويسوي افعال شينه واللي تصرفاته زينه بس هو مثلهم كلهم يفكرون يقولون هالاخطاء اللي نسويها مايحاسبنا فيها الله اللي يحاسبنا فيه الشرطه والقانون وضميرنا .. والدين ماله دخل يحاسبنا لين شربنا الخمر مادام هو مسموح في بلدهم والشرطه سامحه به . والبعض تكون افكاره منحرفه فهم يقولون كل هالشي في مجال العلم ويتصورون ان لهم الحق انهم يغيرون ماشرعه الله تمشياً مع مايراه بعضهم وهالشي خلاهم بعدين خلاص ماعاد يحكمون الدين في شي وشوي شوي وانا ابوك صاروا معاد يؤمنون بالدين اصلا .. واللي مايامن بهالدين معناته خلاص مايؤمنون بالله والعياذ بالله .. عساك فهمت الحين يامحمد ..
محمد : ايه الحين فهمت .. بس ليه يقولون عليك يابابا انك علماني ..
فهد : انا مالي دخل فيهم انا ابيك انت اللي تقول الحين .. ولا جبتك هنا وقمت من بينك أنت وأمك في أحلى لمة الا علشان اكون واقف قدامك وعلشان انت اللي تحكم علي وش انا ..
انا يا محمد ما اصلي ولا أصوم ولا أتصدق ..
محمد : الا يا بابا
فهد : طيب تذكر يوم تسألني عقب ما اذن العشاء وحنا في السوق يوم تقول لي ليه يابابا يسكرون باب المحلات ولا يدخلون الشنط والحاجات المعلقه في المحل .. تذكر وقتها وش قلت لك .
محمد: مادري نسيت
فهد : مو قلت لك لانهم عارفين أن الناس ما راح تسرق حاجاتهم لانهم عارفين أننا مسلمين وعارفين أننا نخاف الله وهو يراقبنا حتى لو مافيه شرطه . ومو قلت لك يوم من الايام لاجيت تسوي حاجه غلط وماحد يشوفك لا تنسى ان الله يشوفك
محمد : ايه يابابا تذكرت .
فهد : ومو انا دايم اقول لامك ياساره حطي الأكل على قدنا لا تكثرين علشان ما نكب نصفه علشان ما يسخط بنا الله ويعاقبنا ..وتذكر يوم اقول لك لا ترجم القطط يعاقبك الله .. وتذكر امس يوم انا وياك نروح نعطي المساكين الملابس يوم تقول لي ما قال شكرا يوم أقول لك احنا ما نبي شكرهم احنا نبي الأجر من الله .. مع انهم ياساره الله يجزاهم خير دعو لنا دعاً وش كثره بس ولدك يبي كلمة شكرا
محمد : أي تذكرت كل هذا بس ليه تقول لي هالكلام
فهد : علشان اذكرك اني اراقب الله في كل شي واسوي كل شي امرنا به الله .. ومو احنا من شوي ان العلماني يعتقد ان الله مايراقبه وانه حر في تصرفاته .. وانه عازل الدين عن الدنيا .. انت شايفني كذا وانا ابوك ؟؟
محمد: لا يابابا بس ليه يقولون عنك علماني اجل .
فهد: لانه ما يعرفوني مثل ما انت تعرفني .. هذولي ناس فاضيه تعلموا لهم كلمتين وببساطه صاروا يتهمون الناس بها .. مايدرون الله بيعاقبهم بسوء الظن .. بعدين اللي قالوا كذا مافهمو كلامي ولا عرفوا وش اقصد في كتبي ومقالاتي .. واكثرهم سمعوا واحدا قال مثل هالكلمة علي وصدقوه ولا حتى فكروا ليه هو قال هالكلام ..
بعدين قبل ما انسى وانا ابوك ترى لا شفت ولا اتصلت باستاذك .. بس انا قلت الكلام هذا علشان اوضح لك ان الكذب على الناس بسيط واننا المفروض مانصدق أي شي الا لما نكون متأكدين منه .. وحتى اوضح لك انه ممكن حتى انت يجي واحد ويتبلى عليك اروح انا اصدقه على طول ؟؟ ولا ياساره ..
ساره : هاه
فهد : لا مانتي معنا الظاهر خذتي لك غفوه .
ساره : بصراحه معكم ولا نيب معكم
فهد : كيف تجي هذي
ساره : رجعت اتذكر قبل 14 سنة يوم جيت تخطبني .. وعرفت اني من ذيك اللحظة وانا محظوظه ومبسوطه فيك .
فهد: ياهووووه لا انا ماقدر على هالكلام .. ايه وبعدين ..
ساره : بعدين مادري كلمتني انت ولا سمعت وش قلت ؟؟ كنت سارحه معك
محمد : احم احم
ساره : معكم معكم ياشين حرف الميم قبله يطيح من كلامي .
فهد : انا اللي احمد الله انه رزقني بولداً سنافي وحرمتاً سنعه .. الله لايخليني منكم ..
ساره : ولا اياك ..


ملاحظة الكلام عن العلمانية قصد ان يكون بصيغة مبسطه لأن الاب يشرح لأبنه الذي لم يتعدا الثالثة عشر . ولا اعتقد ان هذا الشي قد يفوت عليكم .

[منار]

...مرحبا أخوي واقعي...

قبل لا أنقد القصة أحب أقول لك اني عشت معها وفيها يعني حسيت اني جزء من القصة وهذا الشيء قليل من الناس الي يقدر يشعر القارئ فيه.

من الأشياء التي اعجبتني في القصة...

الأمر الذي افتقدته أغلب القصص وهو الفائدة المرجوه من وراء القصة بغض النظر عن قيمتها الأدبية...

لأني فعلا استفدت معلومات كنت ماأعرفها ومعلومات كنت غافلة عنها...وغير كذا.... القصةجعلتني افكر بشكل جدي وواقعي بحقيقة ما يشاع ضد الآخرين من المشاهير...خصوصا في مجتمعنا....

زي ما قلت أخوي واقعي نحن لسنا نقاد....ولكني متأكدة أنك مشروع كاتب ناجح...لأنك تملك نفس طويل في الكتابه وقدرة على إيصال المعنى للمتلقي.

.............مع تمنياتي لك بمزيد من التوفيق.

[تركي]

هلا واقعي ... القصة جميله ومشوقه ...وايضاً ذات فائدة

الأسلوب جميل .... وليس لدى اي تعليق سوى حبذا لو انك ذكرت عمر الطفل من بداية القصة وليس بالنهاية ....
ايضاً لو اخترت موضوع للقصه غير ( حيرة طفل ابوه علماني ) لأن من واقع القصة أن ابوه ليس بعلماني ...

وبالتوفيق انشالله .....

[وآقعي]

شاكر لك لطفك اختي منار على هالكلمات اللي تبث في النفس الحماس والتي هي بالنسبة لي مصدر تحفيز .. ولوقتك الذي اخذته هذه القصة منك .. فالحمدلله ان جهد فكري المتواضع قد نال بعضاً من اعجابك وكان فيه بعض الفائده لك ..
مسروراً عزيزتي بما كتبتي وسيزداد سروري في حال توضيح اوجه القصور في القصة ان بدت لك .
وتسلمين على تمنياتك التي اعمها للجميع انشاءالله .

هلا وغلا اخوي تركي .. اولاً الحمدلله على سلامتك ومن طول الغيبات جاب الغنائم .. وعساك بخير وصحة وسرور دوم انشاءالله ..

شاكر لك ملاحظاتك ووقتك اللي اسعدني ان تتركه لقراءة هذه القصة ..
وبالنسبة لعمر الطفل فقد ذكرته في الربع الاول من الجزء الاول اي في السطر 16 .. بعد اول ست كلمات لمحمد ..
اما بالنسبة لعنوان القصة .. فأنا مع ملاحظتك 100%100 .. وبالفعل فقد فات علي هذا الشي .. والواجب ان يحمل العنوان بعض مضمون القصة لا ان يناقضها .. ملاحظتك في محلها وشاكر لك هالتوجية والتنبيه .

[لمحة حب]

هلا اخوي واقعي مشكور على هالقصه الجميله الهادفه

انت بهالقصه وصلت لنا حقيقه يغفلها معظم الناس

عرفتنا على خطء يقع فيه الكثير منا وهو الحكم على الغير من كلام الناس

الحكم على انسان من كلمه او تصرف

كثير منا يحكم على الانسان الي امامه من اول مايشوفه من مظهره من طريقه كلامه من كلمه سمعها عنه من غيور او حقود

مايحكم عليه من خلال معاشرته

لازم الانسان يصبر ومايستعجل في الحكم على الاخرين ودائما يصدق نفسه

ويصدق الي يشوفه ومايصدق اي اشاعات او كذب يسمعه

[أبو ريناد]

عودٌ على بدء

للرفع و ..

GOING UP

...