الضحك علي الدقون

[صوره]

ياجماعة نادي النقاش الجميليين..
حابة اسالكم سؤال ..
هل من العادي ان الانسان ينضحك عليه 20 مره خلال عمره او اكثر ؟؟
هل من الطبيعي اننا نشوف الناس تضحك علي بعض وتستغلهم وما نهتم؟؟
هل الانسان بطبيعته يميل الي الضحك علي الاخرين ؟؟
ايش اللي يدفع انسان انة يضحك علي انسان ثاني (( او بالعربي يستغلة ))؟؟

انا اتوقع ان هذي العمليات كلنا مرينا فيها .. لكن بنسب متفاوتة ..
بمعني .. مين فينا ماقد مره ما ضحك عليه بياع بمحل وعطاة سعر لشي مختلف عن السعر الاصلي وبحجة ان مافي تسعيرات خاصة فيها ..
انا سافرت لبلد ما(( لقيت اغلب المحلات مو حاطة تسعيرات )) يقيمون الزبون وعلي ضوئة تتم التسعيرة..
هل هذا ضحك علي الدقون ولا لا ..

فيه كلمة اسمعها دايم يقولنها البنات (( صديقتي استغلتني ..او ضحكت علي؟؟
معقولة .. ايش يوصلهم هالمرحلة ..هل هو العشم يخلي الانسان يستغل انسان ولا ايش ؟؟

حابة اشوف رائيكم بالاستغلال الل منتشر مثل فيروس الانفلونزا بالشتاء..

وشكرا لكم

صوره

[سكر هانم]

اول شي يمسيك بالخير صورة ..
انا اقولك .. الناس الحين ماعادوا مثل اول يبون الخير لبعض ..
اي احد الحين يبي شي ..يحصله بأي طريقه ..
سواء كان الغرض هذا عند اخوه عند صديقه .. يبيله يحصل عليه بالاستغلال
والاستغفال ..
اما بالنسبة للاسواق ..انا برضو .. رحت لبلد هالبلد مع احترامي لاهل لكن كثير فيه النصب ..
يسعرون بالغالي اذا انتي خليجيه وبالاحرى سعودية .. وللاسف انتي مضطره انك تاخذين هالشي مع انك عارفه انهم يستغلونك ولكن ما باليد حيله ..
انا... يمكن تجاربي بهالدنيا صغيره نظرا لصغر سني ..
بس اتمنى اني مااكون في محل استغلال ابدا ..
اشكرك مرة ثانيه

[رمادي]

مرحبا صوره


ينضحك علي مره اوكي

مرتين ماشي الحال

لكن 20 مره صعبه

الاّ في حاله وحده

اذا كنت أعاني من خلل في قواي العقليه


هل من الطبيعي اننا نشوف الناس تضحك علي بعض وتستغلهم وما نهتم؟؟

^
^

الناس اجناس

في ناس تهتم وناس ماتجيب خبر

اللي مايجيبون خبر ياكثرهم وانا اولهم

لأني لو انضحك علي محد بيجيب خبري



هل الانسان بطبيعته يميل الي الضحك علي الاخرين ؟؟

^
^

الانسان بطبعه طيب ويحب الخير للناس

والاستغفال سلوك نتيجة تأثير محيطه الاجتماعي

قل لي من تصاحب اقل لك من انت



ايش اللي يدفع انسان انة يضحك علي انسان ثاني (( او بالعربي يستغلة ))؟؟

^
^

الدافع الوحيد هو المصالح الماديه

لأن الاستغلال مرتبط دائما بالامور الماديه

.
.
.

يعطيك العافيه اختي صوره على الموضوع


رمادي

[عازف الناي]

للاسف هذا هو حال ( الطماعيين ) حتى على ابوه يضحك .
ما عنده مشكلة ..

لكن اللي قاهرني .. ينضحك علينا مرة واثنين وثلاث ..
واحنا عارفين انه مضحوك علينا ..

مع كذا نستحي نرادد او حتى نتكلم .. ونسكت .


خلوني اقول هالقصة .

فيه واحد من اصدقائي الخاصين جدا .. سافر الى بلاد عربية شامية ..
وهناك استأجر شاليه لمدة شهر على البحر .. وكان سعره تقريباً ..
2800دولار .. وكان موقع الشاليه بصراحة حلو .. واستأجر بجانبه واحد من اهل البلد وبعد ان تعارفا هذين الجارين اكتشف صديقي بأن جاره استأجر الشالية
900 دولار ..

شفتو الفرق


احنا ناس كاش .. نحب ان الناس تضحك علينا .. واحنا نضحك بعد .


شكرا لصورة .. على طرح موضوع بصراحة عجبني .

عازف

[صوره]

سكر هانم شكرا ياسكر الجميلة علي الرد ... وفعلا انك صادقة الناس معد تفكر بالخير كثير .. واللي حاصل هو استغلال سواء بالمال واو بسوء المعاملة .. وهذا الشي يئلم جدا جدا ..
والظاهر ياسكرتي اننا انا وانتي رحنا نفس البلد اللي غثوني بنصبهم ومكرهم ..

رمادي شكرا لردك ..وفعلا الانسان اذا كثر مستغلية فهو عيب فيه ..بس صدقني احيانا تمر بامور تخليك ما تدقق .. مثل اذا سافرت مع خبصة بزران وانا شفت خليجيات دايم تجيهم فواتير المطاعم غلط والسبب كذب الجرسون بان الطلب جا من الصغير وغيره (( خدامتة مثلا))والصغير ما يتاخذ منه حق ولا باطل والخدامة تنكر انها طلبت والجرسون مصر علي تبلية ..وحفاظا علي المظهر العام وخصوصا ببعض البلدان الشرقيه تضطر تدفع بدون مشاكل ..

عازف الناي شكرا لردك .. وفعلا الانسان احيانا يضطر انه يدفع او يشوف شي معين ويعدية حفاظا علي المظهر العام والآداب العامة ..لكن الفكره اذا جت الخديعة من مقربين او من ناس اعتقدنا انهم محل ثقة ..
لان الخداع العام يحصل مثل ما حصل مع صديقك اللي ببلد الشامي ..
لكن الاستغلال لو جا من انسان توسمت فيه الخير ..هذي برائ مشكلة عويصة ..

صوره