حلقات يوم اني ميت

[المدحدر]

مسيكم ربي بالخير ... طبعا وقبل كل شي هالموضوع حلقاات متواصله ومتشعب وطويل فلو سمحتوا لا احد يرد حتى تكتمل الحلقات ... وشكرا :D


نبدا بسم الله ... تمسكوا زين :


صحيت من النوم ذات يوم لقيت نفسي ميت ... اناظر جسمي ما لقيته :eek: رحت ادور عليه بالبيت لقيت فراشي فاضي :roll: واهلي طالعين ... غريبه .. بدت مصاقيل راسي تدور :roll:

وعلى فكره عندي افكار غريبه ... اولها عدم ايماني بكروية الارض :eek: وثانيها ما اصدق الدكاتره ابد ... اتخيل ان عقل الانسان عباره عن مصقالين داخل كوره :roll: ...

<<< لا عمرك تخيل الله يصلحك :roll:

اما عن كروية الارض فنظريتي مبنيه على صبه قصدي اساس وشواهد علميه تسولف عن نفسها ...

النظرية هي عباره عن تجربه قمت بها بالديره ويمكن تجربها بنفسك علشان تثبت مثلي ان الارض مهيب كرويه

ادوات التجربه : رجل وكوره :o

العمل : شت الكوره للأعلى بأقوى حيلك بس انتبه لا تٌمصع (يجيك مصع) فسوف ترا ان الكوره ترقى (بلا الفاظ سوقيه :mad: ) اقصد ترتفع للأعلى ومن ثم تنزل للأسفل بفعل الجاذبيه وبعد ذلك سوف تصطدم بالارض وترتفع مرتن اخرى .... بحلق جيدا يعني ركز بالمكان الذي سقطت فيه هذه الكوره اللعينه (وش دخلها:eek: ) وعند ذلك سوف تعود الكره مره ثانيه وتسقط في نفس المكان مره ثانيه وترتفع وتنزل لنفس المكان ... وهنا تستنتج ان الارض ليست كرويه وما فيه امل انها تدور زي ما يزعم هالمتخلفين اعني العلماء وهم يقولون ان قطر الارض 24 الف ميل يعني الارض تدور بسرعة 160 ميل بالدقيقه .. يعني حوالي 2 ونص ميل بالثانيه ....

يعني لو كانت الارض كرويه كما يزعمون بالنشره الجويه :eek: (وش دخل النشره الجويه ) يعني انكان طاحت الكوره بمكان ثاني وانا حسبت بساعتي السامسونج :D كم استغرقت الكوره بالهوى لقيتها استغرقت 6 ثواني .. يعني المفروض تطيح الكوره بعيده عني بـ 15 ميل لاني انا ناشب بالارض وهي طايره بالسماء ولو ان الارض تمشي او مدري تدور انتسان دعست عن الكوره قبل تطيح ... (اشوفك قمت تحتسي عامي ... خلك بالفصحى الدعوى دراسات واثباتات لا تفشلنا :roll: )

<<< بذمتكم ما اقنعكم ؟؟ :D



المهم ما علينا نرجع لموضوعنا وهو يوم اني ميت ... المهم وانا محتار بذيك الساعه ادور اهلي .. خطف علي واحد يمشي الف وخمسميه ... قلت خيررررررر !!!! رجع الاخ قال وش تبي ؟؟ قلت انت الي وش تبي .. وش عندك في بيتنا ؟؟؟ :mad: قال بيتكم في عينك ,,,, قلت تكلم زي الناس تراي محترمك ... قال يا حليلك شكلك توك جديد بقراطيسك .. قلت له فسر اكثر ...

قال ولو اني مستعجل ابروح للصين مواعد واحد نشوف مباراة بالبرازيل بس ابعطيك وجه اسمع بالعربي انت نص ميت ونص حي

قلت فسر اكثر :conf: قال بصراحه مدري وش صار لك يا حادث يا عمليه او ان احد مروعك ... قلت طيب واهلي والعالم الي كنت فيه .... قال تقدر تشوفهم ولا يشوفونك :eek: بس ما عليك تراك تبي توسع صدرك ;) قلت طيب وشلون مريت تمشي ترليون من عندي قال ايه نسيت اقول لك انك تمشي بسرعة الضوء وهي 67^10×779877409586 وشششششششش مغط الرجال

قلت خل ابلحقه يبي يروح الصين ... بس وينها الصين ... الي اعرفه انها يمين الشرقيه وانت تناظر الخريطه وامريكا على اليسار قلت خل احط رجلي للشرقيه واذا وصلت ناس عيونهم صغار ابدري اني بالصين ...

مشيت واقل من ثانيه وانا مار على الهاف مون ... شفت واحد مغرز جيت ابساعده بس تذكرت اني مقدر ... كملت شوي ومير اوصل الهند ولاي تعبان ما تعودت اسرع قلت خل ابريح شوي وبعدين فرصه ما قد شفت الهند ...:D


شوي خطف علي واحد يمشي سبعميه ... قلت لو سمحت ممكن شوي قال سم طال عمرك ... يوم شفت وجهه واثره سواق الجيران الي طايحن عليه جدار والى ساعتكم بغيبوبه ... قلت له عرفتني ؟؟ قال وشلون ما اعرفك ما بقى بيضه ما فقعتها فوق راسي ولا مر يوم ما نسمت فيه سيكلي .. عاد استحيت :o قلت له غريبه اشوفك تحتسي مثلنا بدون حركات الهنود ... قال احمد ربك تعلمت لغتكم بسنه ودليت شوارعكم الي يبي لها كمبيوتر سرعته مليون ميقاهرتز علشان يستوعب شوارعكم ... يا اخوي انت تكلم بلغتك وانا اتكلم بلغتي وعقلك الباطن يترجم لا تبلشنا :mad:

قلت يعني انا احاتسيك الحين بالهندي ؟؟ قال ايه :D


قال الا جابك الله تعال فسر لي وش الي صاير بديرتكم ؟؟ وراكم تحتقرونا يالهنود وتعاملونا معاملة العبيد ؟؟؟ قلت بالعكس من يقول

قال عمرك طلعت تتمشى مع هندي ؟؟؟ :roll: مع العلم انا اخوانكم بالدين ...



للحديث بقيه
ممنوع الرد لو سمحتوا الا بعد الاكتمال وشكرا

تحياتي
:rose:

[احلى برونزيه]

خخخخخخخخخخخخخخخخخخخ

شكلك مضيع البشكه:D

[المدحدر]

مرتن ثانيه صبحكم بالخير ونكمل الحتسي الي فوق ....


قام يتحلطم علي ذا الهندي ويلي فيكم وفيكم ... تحترمون الغربي وتحطونه فوق رووسكم وتصكونه بذاك الراتب الي يعيش 100 هندي 30 سنه ... واخذين عنهم فكره انهم هم كل شي وهم الفاهمين والعلماء وهم ما عندهم ما عند جدتي راجي وما دريتوا انكم انتم يالسعوديين فيه منكم الي يغطي عليهم بعلمه وذكاءه وفطنته خخخخ

وجيتوا حطيتوا حيلكم فينا يالهنود وجيتوا تنافسونا بسوق الخضار وتشووتونا واحد واحد .... تركتوا الوظايف ام مية الف وخمسين الف وانتم اجدر فيها وأكفأ وجيتوا تنافسونا على خمسميه وعلى الف وخمس ...

زودها ذا الهندي بالتحلطم وواصل انتقاده ومير يذكرني برجال الاعمال عندنا :D الي ما عندهم الا سب ولعن في السعودي .... يبون سعودي يشتغل بألف ريال زيه زي الاجنبي وعلى فكره مو اي اجنبي ... قصدهم زي الاجنبي الهندي ابو خمسميه وابو الف ريال .... والاجنبي الثاني ابو مية الف مهوب اجنبي ذاك :D هذاك تاج رووسهم :eek:

ينتقدون ويتهمون رجال هالاعمال وينسبون لنا القضايا المعتاده ,,,
صياعه ... دوران .... مقهى .... استراحه ..... الخ


ضاق صدري واستجمعت قواي وتذكرت كل المجلات والجرايد الي قريتها وقلت خل احاول ارد عليه بطريقه علميه :confused:

ما لقيت براسي ولا معلومه ممكن تفيدني ...قانون نيوتن ما ينفع :roll: حسبي الله على هالمناهج تصفي الراس ...

شوي ومير ابدا انتفض وقام راسي ينبض وقمت اتصبب عرق وترتفع درجة حرارتي ... طلعت رساله بين عيوني تقول دافع عن نفسك قل الي بقلبك والا ترا تبي تموت حسره :roll:

زادت حرارة الجسم وقمت اتصبب عرق وبلا مقدمات قلت ........... كيف الحال ؟

قلت اسمع انت ووجهك ياللي تتهمنا بالتخلف والصياعه ... اعلم ان لنا تاريخ يفوق الخيال ومستقبل فاق الامال أٌحبطنا وهُمشنا الى ابعد الحدود وسوف اقابلك بكل تهمه بألف رد ورد (يعرف يحتسي الولد )

نسبت لنا الصياعه ... وهل وفرت لنا مكاناً وقلنا لا ؟؟؟؟ عمرك شفت نادي ادبي يوسع الصدر ؟؟ يا اخي لك خلق تقرى تاريخ المنفلوطي ؟؟؟ او تروح تسير على جمعية جمع الطوابع ؟؟ راس المال المقهى والاستراحه :(


اما بالنسبه للفتاة السعوديه فهي مثقفه الى ابعد الحدود تمتلك ذكاء تاكلك انت واشكالك ... عندك مكان تخليها تروح له غير السوق والملاهي ؟؟


نسبتوا لنا عدم الانتاج .... وهل اعطي الشاب السعودي فرصه للانتاج وقال لا ؟؟؟؟ واذا ودك تعرف قدرة الشاب السعودي على الانتاج شف البنوك ولاحظ مستوى الانتاج ...

البنوك استخاروا وقررو توظيف الشباب السعودي (وجع بنك يستخير ؟؟ ) :eek:
وذلك لانهم ابدوا الانتاجيه والكفاءه بالعمل :roll:


واذا بغيت الشباب ينتج اول عطهم فرصة الانتاج وثانيا خل عنك السيطره الاداريه والمحوريه والبيوقراطيه :eek: (على باله يعرفهن :roll: )
وعطهم راتب زي الناس ولا تقارنهم بأي اجنبي

خخخخخخخخخ صار ممل الموضوع خل نغير الموجه ;)



قال الهندي بصراحه احرجتني (وش دخل الهندي هماه رجال الاعمال قبل شوي )

قلت له لا تحرجني ولا احرجك انا ابروح للصين ابمر واحد عساي الحق عليه واذا ما لقيته ابروح لمه بالبرازيل اكيد ابلقاه بالملعب

وصلت الصين في اقل من 3 ثواني ونصف الثانيه ومير اشوف ذيك العجيز قاعدتن تسبح وتهلل قلت خل ابسألها قلت سلام قالت وعليكم السلام الاخ عربي ؟؟

قلت ايه .. قالت وينكم نحتريكم تجونا تعلمونا الدين :( ... قلت يا خاله وشلون وصلكم الاسلام ؟؟ اكيد كانت معارك ضاريه داميه فيها كتشب ومايونيز :roll:

قالت لا وصلنا الاسلام عن طريق التجاره عن طريق رجال مخلصين ... رجال اذا عاهدو وفوو ... قلت امحق تجار عندنا الحين ... شوفوا مطايرهم ورا الريال واحلبو لبن :(

قلت الا ما شفتي واحد يمشي مليون وخمسمية كليو جرام ؟؟ قالت الا كنه مستعجل راح غرب يم مكه ... قلت بأمان الله المسكينه ما تعرف غير مكه تحلم فيها ليل نهار وغيرها كثير واحنا اقرب الناس لمكه ولا نعرف قيمتها :(



حركت للبرازيل ويوم وصلت لقيت واحد قلت له اميجوو .. ما عطاني وجه .... تذكرت كلام الهندي قلت صح اميجوو يبي يترجمها لمسيك بالخير ... قلت سلام .. ضحك ... قلت هلا .. تبسم ... سألته اكثر من سؤال والاخ يوزع ابتسامات :eek:

طلع الاخ الله يعافينا ولا يبلانا ما يسمع .... ظلمت المسكين ... اشار لي بيدينه قال انا افهم ولا اقدر احتسي ... قلت له ابي الملعب ... قال اول جبل على اليمين خذ يسار ... تجيك نخلتين طول لين تجيك عبريه على يدك اليمين تلاقي الملعب قدامك قلت له ما قصرت ... تذكرت انه ما يسمع ومير اخذ قطعة قماش وقصيتها ... شفت الرجال ضحك قلت اكيد فهم ...



للحديث بقيه

<<< تصدقون انه توهق :roll: ومتحسف


لا احد يرد الين يكمل كل شي وشكرا


تحياتي
:rose:

[المدحدر]

مرتن ثالثه

يالله ان تحييهم .. يا هلا والله ومرحبا .. الزبده



وصلت الملعب شفت الزحمه قلت تو المباراة باديه يمديني اسير على اثنين من الجماعه بامريكا وارجع ... قلت خل ابمر على ابو وجهين اول ... وابو لسانين لاحقن عليه بعدين ...

وابو وجهين هذا على فكره نسميه او نعيره ابو وجهين عشانه يوم تعدى سن الفلم اقصد الحلم رقى فوق السطح يبي العبرية الي عند الجيران وما درى الا مرة الجيران ملحقته الملاس الي شق راسه نصفين ودلت دمامينه تخر وصارت عنده عقدة من الاماكن العالية خخخخ :D

ابو وجهين هذا من عرفناه داشر ومصرقع ومهوب لم سنع بس الحظ الي وداه للرياض ودرس ثانوي ويوم جا من الرياض قال لابوه ابروح ادرس بامريكا ...

عاد انا كانوا يعقدوني ويقهروني اذا قالوا لي الله يصلحك وتصير مثل فلان والا علان .... وخاصه اذا صار هالفلان ما عنده حتى الابتدائيه وشافعن له انه مذن ... ويقرا له كم كتاب مدري من وين جايبهن وكل يوم والثاني جاينا يحرم ويحلل على كيفه ... ما بقى شي ما حرمه حتى اشارة المرور يقول حرام تاقفون عندها ... يقول الطاعه ما تصرف الا لله وهذي الاشاره صنم ... لعنبوا ابليسك انت شايف هبل واقف فوقها يوم انك تقول صنم ..؟؟ :eek:

خخخخ لا وتعال صب القهوه الفجر لهالشياب ... تصب القهوه وما فيه تعبت :( اصب القهوه وعيناي مفتوحتان على مصراعيهما انظر لذلك المتعجرف القابع في الركن عله يعتق الفنجال الصريع بين يديه ...
ربي لم اعد اتحمل ... قواي تخور ورائحة الهيل تصرعني وتتغلغل في اعماق نخاشيشي ... احس بدوار يا الهي ... صحيت من حلم اليقظه :roll:

خخخخخخخ ترا ما اعرف احلم الا عربي فصيح :D

المهم قلت ابروح اجلس باخر المجلس اريح شوي من عناء صب القهوه عليها لعنة الله :mad: ما دريت الا فنجال يشق جبهتي قادم من جهة والدي ويقول لا تخلي الدله ...

كن سعلو بيجي ياكلها لو خليتها :eek: ... مدمنين اللهم عافهم ولا تبلى شباب هالوقت مثل ما بليت شياب هالوقت بالقهوه :roll:



نرجع لخوينا ابو وجهين ... يوم قال لابوه ابروح لامريكا وجته البعثه ... ابوه عزم اهالي هالديره على العشاء والله يعين ام ابو وجهين على الطبخ والنفخ لو هي من بنات هاليومين انكان قالت للابو يا اخوي ودهم لم ماكدونالد :roll:


المهم كل هالذكريات وانا بالطريق من المكسيك لامريكا ... وصلت لشقة ابو وجهين وادخل ولا وش اشوف .. لقيت البيت مليان شموع وصوت الموسيقى ودخلت لقيته بالحمام والشموع حوله ومشغل اغنية : هلو ازت مي ذات يو لوكنق فور ..... والترجمه حقتها : يالله صبوا القهوه وزيدوها هيل :roll:


ودي اتفلسف شوي :cool:

ابو وجهين يعاني من صدمه حضاريه واللي ما يفهمون الا انقليزي يعني (كلتشر شووك ) صدمه ما يصلحها اطلق سمكري بالصناعيه ... يعاني ابو وجهين من الاعجاب بتقدم الغرب ... وليس الحضاره فهم لم يمتلكوا حضارة قط ..

فهو منبهر الى درجة الاعجاب والحب .. وفي هذه الحاله يهمش الانسان نفسه .. تاريخه .. اصله .. ودينه :(

الاعراض الخارجيه : تغير في الشكل الخارجي يسبقه انتزاع للحياء و الغيرة

الاعراض الباطنية: انعدام العقل وتعطله عن اداء وضيفته الاساسيه يصاحبة النفي والشعور بالكمال في هذه الحالة لايتقبل العقل ان صحت التسمية أي معلومة ..

ختام الفلسفة: ليس عيب ان نعجب او نحترم تقدم الغرب وليس هناك أي عيب ان نتعلم منها لكن العيب كل العيب ان نهمش حضارتنا ونحتقرها من اجل تمجيد تلك الحضاره


تحياتي واتوقع الى هنا وينتهي الكلام الي يبي يرد حياه الله
:rose:

[*المملوحه2002*]

لا ابد سلامتكم ماصار شي هنا ولاشي:D
الرد تلقونه تحت:D تفضلوا...
<<------تصرف:roll:

[*المملوحه2002*]

الله مير يسلمك مدحدر بيك على هيك مواديع:cool:
من جد من جد الموضوع اكثر من راااااائع
و يزينه هالهندي اللي فيه يحتسي بلهجتنا:p :D

وعلى فكره عندي افكار غريبه ... اولها عدم ايماني بكروية الارض
8
8
نفس الفكره عندي:roll:
بس اللي منيب مؤمنه فيه ابد سالفة الجاذبيه الارضيه:eek:
يعني الكرسي مثلا لو انه على الارض عشان الجاذبيه؟؟:roll:
ياخي شي مادخل مخي ابداااااا:eek:
هو يمكن اقتنعت شوي بس مهيب عاجبتني الفكره:roll:
قال جاذبيه قال....:eek:



عاد انا كانوا يعقدوني ويقهروني اذا قالوا لي الله يصلحك وتصير مثل فلان والا علان
كلن يعاني من هالعقده:cry:
بس انا يجيني تفكير احيان اقول
الناس مايقولون لبناتهن ورا ماتصيرين مثل مملوحه؟؟؟:roll:
والا بس اهالينا اللي يقولون ذا الشي ؟
ويضربون لنا امثال شوفي فلانه و زعطانه؟؟:eek:
يعني هالشي ممكن انه يصير؟؟<<----طايحه من عين نفسها:p
ايه يصير غصبن عنهم يصير..وش معنى اهالينا يقولون
ورا ماتصيرين مثل فلانه و علانه؟؟:mad:




قام يتحلطم علي ذا الهندي ويلي فيكم وفيكم ... تحترمون الغربي وتحطونه فوق رووسكم وتصكونه بذاك الراتب الي يعيش 100 هندي 30 سنه ... واخذين عنهم فكره انهم هم كل شي وهم الفاهمين والعلماء وهم ما عندهم ما عند جدتي راجي وما دريتوا انكم انتم يالسعوديين فيه منكم الي يغطي عليهم بعلمه وذكاءه وفطنته
ياخي مدري ليش السعودي طايح من عين نفسه؟؟<<---معلقه على هالكلمه اليوم مدري وش عندها:roll:
اقصد انه محتقر نفسه :eek: حتى الله يهديه
من كثر ماهو محتقر نفسه مخلي غيره يحتقرونه:roll:
تدرون ذا من وين يجي؟؟قصدي حقرة الواحد لنفيسته:roll:
هذا ينشأ من عدة عوامل<<---بدينا التفلسف:roll:
اولها واهمها التربـــيـــه..
مثل لما الاهل يقولون لعيالهم شف فلان!!ورا ماتصير مثل علان؟؟:roll:
والله شي يقهرررر...:cry: :eek:
<<----اقول لايكثر :D

ومير يذكرني برجال الاعمال عندنا الي ما عندهم الا سب ولعن في السعودي .... يبون سعودي يشتغل بألف ريال زيه زي الاجنبي وعلى فكره مو اي اجنبي ... قصدهم زي الاجنبي الهندي ابو خمسميه وابو الف ريال .... والاجنبي الثاني ابو مية الف مهوب اجنبي ذاك هذاك تاج رووسهم
والله انك صادق:(
ااااخخخخخخ شي يقهررررر من جد:mad:


اصب القهوه وعيناي مفتوحتان على مصراعيهما انظر لذلك المتعجرف القابع في الركن عله يعتق الفنجال الصريع بين يديه ...
ربي لم اعد اتحمل ... قواي تخور ورائحة الهيل تصرعني وتتغلغل في اعماق نخاشيشي ... احس بدوار يا الهي ... صحيت من حلم اليقظه
اخسسسسس يا الفصحى...ياخي عذبتنا بهالفصحى ارحمنا:p :p :p :p :p
طيب انت ماتعرف شي اسمه
((لاجت القهوه وهق اخوك و حط رجلك))؟؟:D :D
ترا يمدحونه:cool:



ختام الفلسفة: ليس عيب ان نعجب او نحترم تقدم الغرب وليس هناك أي عيب ان نتعلم منها لكن العيب كل العيب ان نهمش حضارتنا ونحتقرها من اجل تمجيد تلك الحضاره

طق طق طق طق <<-----تصفيق:D



يعطيك الف عافيه اخوي مسيوو مدحدرووو على الفلسفه السنعه:D
وكثر من هالزين الله يسلمك..
خل الناس النايمه على ودانها تصحصح شويه:D :p <<---قلبنا مصري


و يسلمووووووووووووووووووووووووو: cool:


:rose: با111111ييييييييوووووووووووووو :rose:

[المدحدر]

الله مير يسلمك انتي والله يالمملوحه على ردك وتشريفك الموضوع وجبرك بخاطر من كتب هالموضوع :rose:


خخخخخ مير التوبه الواحد يعتب يكتب فيذا :roll:



مملوحتنا اجل زيي ما تؤمنين باللي انا مااؤمن فيه .. خخخخخ وانا اقول منذ مبطي العباقره بهالدنيا شويين انا واياتس وكم خبل معنا



وبالنسبه لتعقيد الاهل وخلك مثل فلان وعلان ... الظاهر ان اهلك واهلي لاقيني انا واياك يلعبون علينا ... والا وش ملحنا اتحداهم يلقون زينا :cool: عبقريه واخلاق وذوق وملح وقبله وفلسفه وكل حاجه ما نقول ما نعرف :D




صحيح يالمملوحه السعودي يحاول يدور الرزق من ابسط الطرق بنظرته مع ان الفرص كثيره الي توفر له افضل السبل لانه يصير ماسك افضل المراتب واجدرها



خخخخخخخ مملوحتنا كان المقطع حق القهوه من واقع التراث خخخخ وحركات الشياب يعني ليس بالضروره يمثلني ... خخخ لاني حاطن رجلي منذ مبطي منذ اربع اسنين :D


والله يسلمك على التصفيق :o


وربي كلك ذوق على ردك الي رفع المعنويات وبث الحماسه في دمجتي واقدر لك هالكلام الي قلتيه وشي طبيعي ماهو غريب عليك


تحياتي لك
:rose:

[تمارى]

آآآآآآآه يا أم رأسي :cry: ياخوي جبت لي الصلع من كثر الأفكار اللي قاعد تتحشى فيها :roll:
صار فيني زي اللي راح على الدكتور يبيعه دوا طلع من عنده مسوي له عملية مصران مفتح :eek: أقصد أعور :D

أباخذلي دوش موية متجمدة وأرجع يمكن أصحى عقب ذي الدوخة والصرقعة اللي سببتها لي :cry:

[نور الكون]

إقتباس:
______________________________ ______________


قال ولو اني مستعجل ابروح للصين مواعد واحد نشوف مباراة بالبرازيل بس ابعطيك وجه اسمع بالعربي انت نص ميت ونص حي

قلت فسر اكثر قال بصراحه مدري وش صار لك يا حادث يا عمليه او ان احد مروعك ... قلت طيب واهلي والعالم الي كنت فيه .... قال تقدر تشوفهم ولا يشوفونك بس ما عليك تراك تبي توسع صدرك قلت طيب وشلون مريت تمشي ترليون من عندي قال ايه نسيت اقول لك انك تمشي بسرعة الضوء وهي 67^10×779877409586 وشششششششش مغط الرجال
______________________________ ______________



<<<<<<<<<< حست انها تطالع سبيس توون


إقتباس:
______________________________ _______________

قال عمرك طلعت تتمشى مع هندي ؟؟؟ مع العلم انا اخوانكم بالدين


______________________________ ________________

وهو صااادق
وراكم ما تتمشوون مع الهنود وتصادقونهم هاااااااااه؟؟
<<<<<<<< ودها تشوف سعودي يهز راسه مثل الهنود :P :happy: :happy:







إقتباس:
______________________________ _________________


قام يتحلطم علي ذا الهندي ويلي فيكم وفيكم ... تحترمون الغربي وتحطونه فوق رووسكم وتصكونه بذاك الراتب الي يعيش 100 هندي 30 سنه ... واخذين عنهم فكره انهم هم كل شي وهم الفاهمين والعلماء وهم ما عندهم ما عند جدتي راجي وما دريتوا انكم انتم يالسعوديين فيه منكم الي يغطي عليهم بعلمه وذكاءه وفطنته خخخخ

______________________________ ___________________


ااااااااااااااخ بس لاتقلب المواجع :mad:
<<<<<<< ما تدري وش كانت بتسوي لو كانت ولد وتشوف هالمهازل الي تصير :mad: :rool:

المشكله في هنود يشتغلون برواتب تعيش 100 سعودي عندنا وينهبون نهب وعلى قلوب الناس مثل العسل
قال ايش قال اجنبي
يعني يفهم اكثر من السعودي ولد البلد والي يخاف عليه اكثر من اي شخص :mad:

إقتباس:

______________________________ ____________________


نسبت لنا الصياعه ... وهل وفرت لنا مكاناً وقلنا لا ؟؟؟؟ عمرك شفت نادي ادبي يوسع الصدر ؟؟ يا اخي لك خلق تقرى تاريخ المنفلوطي ؟؟؟ او تروح تسير على جمعية جمع الطوابع ؟؟ راس المال المقهى والاستراحه


اما بالنسبه للفتاة السعوديه فهي مثقفه الى ابعد الحدود تمتلك ذكاء تاكلك انت واشكالك ... عندك مكان تخليها تروح له غير السوق والملاهي ؟؟


نسبتوا لنا عدم الانتاج .... وهل اعطي الشاب السعودي فرصه للانتاج وقال لا ؟؟؟؟ واذا ودك تعرف قدرة الشاب السعودي على الانتاج شف البنوك ولاحظ مستوى الانتاج ...

البنوك استخاروا وقررو توظيف الشباب السعودي (وجع بنك يستخير ؟؟ )
وذلك لانهم ابدوا الانتاجيه والكفاءه بالعمل


واذا بغيت الشباب ينتج اول عطهم فرصة الانتاج وثانيا خل عنك السيطره الاداريه والمحوريه والبيوقراطيه (على باله يعرفهن )
وعطهم راتب زي الناس ولا تقارنهم بأي اجنبي


______________________________ ____________________




صح لساااااااااااااااااانك :D
<<<<<<<<< عجبها الكلاااام :D:D

ونزرع في الشباب الثقه بانفسهم قبل كل شي وندعهمهم ونشجعهم وما نحسسهم انهم اقل من اي شخص :)


إقتباس:

______________________________ __________________


ابو وجهين يعاني من صدمه حضاريه واللي ما يفهمون الا انقليزي يعني (كلتشر شووك ) صدمه ما يصلحها اطلق سمكري بالصناعيه ... يعاني ابو وجهين من الاعجاب بتقدم الغرب ... وليس الحضاره فهم لم يمتلكوا حضارة قط ..

فهو منبهر الى درجة الاعجاب والحب .. وفي هذه الحاله يهمش الانسان نفسه .. تاريخه .. اصله .. ودينه

______________________________ ___________________



ياااااا هو يقهررررررني بشكل ابو وجهين هذااا :mad:
يررررفع ضغطي من جد :mad: :roll: :roll:

ناس مهما صار عندها تحس انها اقل من الغرب :(
اغبى من الغرب :roll:
منبهريين بالغربيين بشكل خيالي خصوصا بالامريكان
يا ناس الامريكان اغبيااااااء والله اغبيااااء
ومتخلفين:roll:
تدرون ان الى الحين عندهم شباب اميين ما يعرفون لا يقرون ولا يكتبون؟؟ :roll:
تدرون انهم ما يدرون عن العالم الي برى بلدهم ولا شي ومخفات كل شي يصدقونه
يعني علشانهم يهتمون بالعلم ويحاولون يبرزون نفسهم ويحاولون يجيبون اي عالم من برى ويشجعونه ويعطونه جميع المحفزات والجنسيه علشان يصير امريكي صاروا اذكياء؟؟
اصلا اي احد يروح ويشوف الي يدرسون دراسات عليا هناك ايش هم؟؟
99% منهم غير امريكيين الاصل
يشوفون الي يسوون الابحاث والتجارب منهم ايش هم؟؟ :roll:
شوفو نسبة العرب المخترعين والباحثين هناك؟؟
الواحد يقعد عندنا ما احد يعطيه وجه ولا احد يحسسه انه يسوي شي كبير لما يبطل طموح ومحاوله ويحس انه ما قاعد يسوي شي مفيد وما يجيب الا التعب لنفسه :roll:
ولما يروح هناك يعطونه اكبر العروض وبا اضخم عروض علشان يحرصون انه بيستمر عندهم وما يرجع لنا :roll:
وطبعا ما راح يرجع..
مين الغبي الي يترك النعيم ويجي للتحطيم والاحتقار؟؟ :roll:
بس طلعنا اغباء منهم لاننا منخدعين بمظهرهم
منغشين فيهم وصرنا ما نفكر مثل ما هم ما يفكرون :roll:
واكبر همنا اننا نحاول نصير مثلهم
وطبعا مهما صرنا ما راح نصير مثلهم
حتى لو صرنا متقدمين اكثر منهم بعد بنحس بعقدة النقص ال فينا :roll:


الله يخلف بس:roll:




<<<<<<<<<<<<< كانت بتكمل بس حست انها طولتها :roll: :p



الف شكر يا دحديره لانك عطيتنا المجال اننا نفضفض شوي :D

[المدحدر]

تماري

وش تبيني اسوي ....كتاباتي بعلم النفس لازم تصير كذا :D وتكون متوجهه لفئه معينه هي الي تفهم النقاط الي فيها ...

اقول اوخيتي لا عمرك تقرين لي شي برا التبكيش ;)



=============

نورنا

الف شكر على ردك وكلامك

فعلا اضفتي لموضوعي بعضاً من التميز لما اضافه ردك من ابداع خخخخخ

لا من جد الله مير يسلمك يا نوررنا وشكرا على التوقف بالموضوع والرد عليه وانا فعلا ممتن لك بهالجميل :o


تقبلي تحياتي وترا الموضوع موضوعك تاخذين راحتك لو تبي تطيحين فيني عادي :D


:rose:

[كراميـل]

مرحبا اخوي المدحدر بصراحه جهد رائع وتشكر عليه....وموضوعك مرررررررررره حلو...


اولا ابغى اقول اني اوافقك في كل كلمه قلتها والمفروض ان احنا ماننبهر بحضارتهم ونترك دينا وقيمنا بمجرد انها تخالف هالحضاره وان احنا نحاول ناخذ منهم اللي ينفعنا ويتفق مع دينا اولا ومع تقاليدنا وعاداتنا ثانيا ...

ختام الفلسفة: ليس عيب ان نعجب او نحترم تقدم الغرب وليس هناك أي عيب ان نتعلم منها لكن العيب كل العيب ان نهمش حضارتنا ونحتقرها من اجل تمجيد تلك الحضاره
وان نتذكر دائما ان حضارتهم قامت على انقاض امجادنا وحضارتنا...

الشي الثاني اللي ودي اقوله هو عن انتاج الفرد السعودي ومقارنته بالعامل (الهندي) اللي يكرف ليل نهار ... وعدم مقارنته بالعامل (الغربي )اللي يتوقف عمله على الاشراف والاوامر ودوامه ست ساعات في اليوم وشف كم ياخذ والله من جد ظلم يجيك واحد جامعي وشهادات ودنيا وفي الأخير ان تعين ب3الاف ويحمد ربه صباح مساء ...واللي مامعه شهاده لايفكر انه يتوظف وان توظف فتكون وظيفته حيالله يعني وظيفه اي كلام هو والهندي واحد ...ورجال الاعمال ماقصروا يخلون المدراء اجانب واللي تحتهم سعوديين وخذ من الأوامر والتهزيئ ....واصعب شي على الانسان انه يهان في بلده...

معليش اخوي انا عارفه اني طولت بس موضوعك متشعب ويحتاج كلام كثيييييييير...
مره ثانيه يعطيك الف الف عافيه على موضوعك القيم وجهدك المبذول فيه....

[تمارى]

المدحدر خخخخخ فئة معينة أجل ههههههه أكيد فئة محششين الكراث خخخ
شكلي بقرالك كل شي لأن فعلا كتاباتك روووعة :star:

بس لا تصدق :p

عندي تعقيب على كلام كراميل
مالها علاقة عدد ساعات العمل اللي يهم هو الأنتاج يعني تلاقي شخص يشتغل ساعتين ينتج أكثر من شخص يشتغل عشرين ساعة العامل الأساسي هو الكفائة واللي يفتقدها شبابنا حتى خريجي الجامعات

وحتى بدوائر العمل تلاقيه ما همه من الشغل غير السوالف والكلام على فلانة وفلان ولو يقدر يفك له لعبة بلوووت ما قصر خخخخخ

أنا أشوف طريقة السعودة اللي يطبقونها غلط قبل ما تفكر تحشر شباب غصب بمجال حيحوسوا فيه خلهم يفرضوا نفسهم بكفائة بذا المجال

بالنهاية مش الغرض من العمل أن الشاب يستلم راتب آخر الشهر وبس المهم برضو أيش قدم للوظيفة والمجتمع والبلد وألا راتب مش تعبان فيه أكيد بيروح على أشياء مالها داعي

وبسسس

[كراميـل]

مرحبا عيوني تماري...

معليش استاذنك اخوي المدحدر اني اعلق على كلامها....

اولا ياعيوني من قالك ان ساعات العمل ماتاثر بالعكس هي من اهم مقومات الانتاج ...لان الواحد اذا كانت ساعات عمله قليله اكيد بينتج اكثر يعني بيكون عنده طاقه اكثر من اللي ساعات عمله كثيره بيكون مرهق تماما ومايمديه يخلص من الدوام الا وهو راجع له بعد كم ساعه...عشان كذا تشوفينهم في الدوائر الحكوميه الرسميه محددين ساعات العمل بثمان ساعات وممنوع تجاوز هذي المده يعني مايحق للمدير انه يخليه يشتغل اكثر من كذا ...عشان الواحد يقدر ينتج اكثر....

ثانيا مسألة ان الشباب يقضون اكثر فترة الدوام في السواليف هذا كان اول الحين بدوا ينتبهون لنفسهم ويصحون ...وصار فيه اهتمام اكثر من السابق في مسأله قضاء وقت العمل...

أنا أشوف طريقة السعودة اللي يطبقونها غلط قبل ما تفكر تحشر شباب غصب بمجال حيحوسوا فيه خلهم يفرضوا نفسهم بكفائة بذا المجال

بالعكس الحين بدوا يطبقونها على طرق صحيحه واكبر مثال على ذالك سعودة محلات الذهب ... فتحوا مراكز للتديب قبل لا يبدون مرحلة السعوده ...
بس اللي مو عاجبني فيها انه ليش مايسعودون الوظائف العاليه مثل الدكاتره والمهندسين واساتذة الجامعات والكليات وحتى مدراء المدارس والمدرسين اعتقد الجامعيين اولى انهم يوظفون ...

بالنهاية مش الغرض من العمل أن الشاب يستلم راتب آخر الشهر وبس المهم برضو أيش قدم للوظيفة والمجتمع والبلد وألا راتب مش تعبان فيه أكيد بيروح على أشياء مالها داعي
الغرض يكون الاثنين جميع يعني عشان يحصل راتب وعشان ينفع المجتمع يعني تبغينه يكد ويتعب وفي الأخير مايحصل ثمن جهده وتعبه .... مافيه احد مايتعب في دوامه اقلها قومة الصبح بدري .... واحنا صحيح مو محتاجين كثير حق راتب آخر الشهر يعني بحكم ان الآباء عندهم مصادر دخل كثيره غير هالراتب بس الشباب ماعندهم غير هالدخل عشان كذا ملزوم انه ينتظره ...ويحاول يحافظ عليه...

معليش سووووووري حبيبتي تماري بس حبيت اوضح لك وجهة نظري...

وآسفه اخوي المدحدر اني طولت في الموضوع اتمنى ان هالشي مايضايقك...

[المدحدر]

كراميل


الف الف شكر على مرورك واضافتك المتميزه وردك الثاني ...
وبالعكس الموضوع موضوعك وما يحتاج تشاورين الله يهديك ... لي الشرف والله


واعذريني عن الرد على ردودك لاني والله هاليومين ما صرت ادخل الا بالدقايق والواحد يبي له الوقت يرد بردود تستاهل على ردودك ...

وان شاء الله لي رجعه بس حبيت اقول لك تراك مسموحه وبالعكس يسعدني كثير ..




تماري ..

مشكوره وتسلمين على ردك وتعقيبك وبرضوا سامحيني على عدم التفصيل بالرد ... بس لي رجعه اكيد


تحياتي لكم يا كراميل وتماري
:rose:

[ساندي بل]

اهلين اخوي المدحدر
موضووووعك مررره يجنن وحلو مثلك والله يسلمك ويخليك لنا وتجيب لنا مواضيع تضحك مثل ذي
وتصدق اني وانا اقرى اثباتك على ان الارض مش كرويه بغيت اصدق وروح اسال معيده في الفيزيا واوريها نظريتك واقول لها نظريه المدحدر صحيحه ولا لا
وصراحه عندك اسلووووب حلو واسلوب يجذبك للقرأه
وانا انجذبت للموضوع وجد1 عاجبني
بس.........:o :o :o :o بقوووول شي اتمنى ماتزعل
في شي او بالاصح بعض العبارات شوي حسيت ان فيها شي والمفروض انها ماتنكتب مثلا مكه المكرمه من قال انا مانعرف قيمتها بالعكس احنا اكثر الناس اللي نعرف قيمتها وانها هي اللي مشرفه بلدنا.......
وبس حبيت انبهك حتى ولو كان الموضوع مزح
وعلى العموم الف شكر على الموضوع الرائع
مع تحياتي
ساندي بل