مو معقوله ..لهالدرجه احنا طيبين ..

[صوره]

تحكون ان المجتمعات الثانيه فيها ومافيها ..واننا ماعندنا شى واحد من اللى عندهم ..
تعرفون ليش ..لاننا صامين اذانا ...والوباء قاعد ينتشر ..
الاعلام عندنا مايسلط الضوء على شي ..
لكن اسالو اللى يشتغلون بالمهن اللى لها احتكاك قوى ..بتسوعون الاجابه ..
اننا نعانى مثل الشعوب الثانيه ...او اكثر شوى ...وان مشاكلنا طفحت ..وريحتها فاحت مثل المجارى وكل اللى سوينه اننا تلطمنا ..لكن اننا نحل المشله ونستاصلها ..لا والف لا ..
الانكار هو الشى الوحيد اللى نفهمه ..كل سؤال نلاقى اجابته الانكار ...
(((لا لا مستحيل احنا عندنا جرايم اغتصاب ..مستحيل ..احنا نقيين ..متديننين ..نعبد الله ..وندعى بالليل ..))) ملائكه مو بشر ..
نقول فيه بيوت دعاره ..الاجابه (((تكون ..مستحيل ..ان الطهر والعفه خلقت لنا )))..
نفول فيه رشاوى ...الاجابه ..((((مسسسسسسسسسستحيل ..هذا لا يحدث بكوكبنا ))))..لانى بديت استشف اننا سكان كوكب ثانى مستحيل نكون بشر ..
نقول ..فيه سرقه ..بيوتنا قاعده تنسرق ..تكون الاجابه ..((( قطع اليد حد السارق))) ..طيب محنا عارفين ..بس ايش الحل ..هل عرفنا السارق ولا ليش سرق وينه ...
الفكره .... اننا شعب نبالغ لدرجه مزعجه جدا جدا ..
واللى صاير مزعج اكثر ...التناقض اللى لا يعقل ..
طرحو بعض الاخوان عن مشاكل نعانيها ..قبعو فيه وقالوا (((((( لا لا انت مستحيل تكون مننا لا لال لال لاللالالالالالالالالالالالا )))))))))
ياساتر ...
طيب ياريتكم تدلونا على كوكبكم علشان نسكن فيه ..هذا الكوكب اللى مافى مثله ..
ماقول الا الله يصلحكم ويكبر عقولكم ...وبطلو ..هالسوالف لانها ما تدل الا على سذاجه مابعدها سذاجه ...

صــــــ مبداء ( كلا كلا وليس هناك بادله )ـــــــــــــــوره

[منادي]

هلا صورة.............
بالحقيقه من الطبيعي أن تحدث هذه الأمور وهي التعتيم الإخباري عن مثل هذه الأحداث ،فكما هو معروف إن العادات والتقاليد في كثير من الأمور لا تسمح بأن نقول أن فُلانة أُغتصبت أو فلان من الناس يشرب خمر أو يزني أو .....ألخ.

لكن لو كنا صادقين مع أنفسنا فإن الحمد لله مافي ذيك المشاكل الطافيه على السطح بالقدر نفسه عند الدول الأخرى،لكن نحن تعودنا على التعتيم في هذه الأمور خوفا من كلام الناس.................

لكن مثل قلتي إننا قابلنا هذه المشاكل بنوع من برود الأعصاب ولم نكافحها والمفروض إن المواجهة لمثل هذه الأمور هي اللتي سوف تحل هذه المشاكل ،لكن في غياب دور تربية إجتماعيه فاعله تبقى هذه المشكلة مستعصيه................

تحياتي :)

[وآقعي]

اهلا عزيزتي الغالية صوره ..

اول ماقرأت هذا الموضوع على طول جاء في بالي مقال قرأته في صحيفة الحياة للكاتب الكبير داود الشريان وراح اختصر قبل ان ادخل في النقاش في هذا الموضوع فحوى او بما معنى ماقال :

وقت اجتماع سمو ولي العهد حفظه الله بالمسئولين عن التعليم (المنقول تلفزيونيا) تكلم وزير المعارف وبعده رئيس تعليم البنات عن التعليم ووكلائهم عن التعليم بصورة تظهر لولي الأمر ان التعليم لايعاني من اية مشاكل .. (والواضح لسموه ولنا انه يعاني من كثير من المشاكل) .. وبدلاً من ان يستغلون هذا الاجتماع بوجودهم بمجلس سمو ولي العهد المفتوح دائما كما هو صدره حفظه الله لاظهار الحقيقة و مايعيق التعليم .. تكلموا عن ماتحقق ولم يذكروا ابداً الكثير من مايعانيه التعليم من مشاكل وكأن التعليم قد وصل لقمة المأمول منه . (انتهى ما اتذكره من المقال) .

وحيث اني من من سعدوا بمشاهدة هذا اللقاء عبر التلفزيون السعودي ..
تم طرح الاسئله المكتوبه على سمو ولي العهد من بعض الاكاديميات في الجامعات السعودية وقد تم طرح كذا سؤال اغلبها ان لم يكن جميعها عن بعض العوائق والمشاكل التي وعد فيها سمو ولي العهد خيراً واصدر توجيهه الكريم للمسئولين بمناقشتها واعطاءها الاهتمام .
بمعنى اوضح نظر لبعض العوائق اللي ذكرتها المسئولات واللي تهم الكادر التدريسي و الطالبات لكن مانظر لما يعانيه الطلاب لإن وزير المعارف قال ان كل شي عال العال ..

ما اود ان اقوله هنا .. ان وجهة النظر المضلله والتي تظهرنا وكأننا الشعب الذي لايوجد عنده اي نقص في البنية التحتية او اية عوائق في كثير من الامور او مشاكل ادارية واجتماعية مسئولية كبيره وليست بالبساطة التي يعتقدها البعض .. (ولكم التعليق عن فحوى مقالة الاستاذ/ داود الشريان)

لانريد جحوداً لما نتمتع به ولا نريد تضليلاً من الرأي العام لما نعاني منه .. ولا نريد تكبيراً لاحداث لم تصل لمستوى ان يقال عليها ظاهره .
نريد الشفافية والوضوح .. لانكذب على انفسنا قبل ان نكذب على الاخرين حين نصور مجتمعنا بالمجتمع الكامل الطاهر .. لإنه لا وجود للمدينة الفاضلة ..

لو قلت للبعض مثلاً ان عندنا اعوذ بالله دعاره خفيه .. ومشاكل مخدرات وو راح يكذبك ويوصفك بانك سلبي وتحاول تشويه صورة مجتمعنا .
ولو قلت له عندنا نقص في الوظائف على المستويين ذكور واناث وقصور من الشئون الاجتماعية .. راح يوافقك الرأي ويستمر معك في هذا الهم وياخذ ويعطي معك ويزيد على كلامك . (ولا تنسون هالنقطة راح نرجع لها)

وسولف معه شوي ودردش وقله .. البلد العربي الفلاني الله يكفيك الشر نسبة كبيره من شبابه امتهنوا البلطجه والنصب وبعض فتياته الله يحرس فتاياتنا امتهنوا الدعاره .. وتصدق يقتلون بعض لاتفه الاسباب .. في رايك وش الاسباب لكل هالاشياء ؟؟
راح ينط عليك وكأنه جاب التايهه .. الله يهداهم ويكون في عونهم مجتمع مالاقي بعض افراده ما ياكلونه وتلاقي الواحد يصرف على كومة عيال وعددهم كبير وحكومتهم وش تلحق عليه ولا عليه .. وضروف بعضهم الماديه والقاسيه وصلتهم لحد الاكتئاب والجنون .
(ارجع لنفس النقطة اللي قلت بنرجع لها) .. ماهي شبيها جداً بنفس الضروف اللي حطوا فيها ابناء المجتمع العربي اللي تكلمت من شوي معه فيه !!!

احيان كثيره الظروف تعطيك نفس نتاج الضروف .. وقصدت ان اضرب المثال في بلد عربي حتى لايقال ان احنا شعب مسلم وفيه مايقيدنا ان لاتنتج نفس نتاج هالضروف اللي تنتج في مجتمعات اخرى في مجتمعنا .
احنا ننقص من انفسنا لو كذبنا على انفسنا .. والخير والشر موجود في كل المجتمعات ولا وجود لمجتمع بلا بشر .. تعالوا نسلط الضوء على المشاكل الموجوده عندنا ونوعي فيها الآخرين بدل ماننكرها . تعالوا نتكلم بما هو فينا لا بما هو مأمول منا . لانكون انانيين ونخلي الجيل القادم يصتدم بمشاكل انكرنا وجودها ولقى نفسه في معمعتها من نكراننا لها .

مجمتعنا السعودي نفخر به ونسعى ان يكون افضل المجتمعات لكن هالشي مايكون إلا بالتطرق لكل ماهو حاصلاً عندنا بغية حله وتعديله للافضل .
خلونا نكون واقعيين ونكون صريحين مع انفسنا ومع الآخرين ونناقش ماتفشى في مجتمعنا قبل مانتفاجأ بيوم يحصل مع اقرب قريب لنا شي من اللي انكرنا وجوده .. التعداد السكاني عندنا زاد ويزيد بمرور الوقت وبنسبة الاحتمالات كل مازاد البشر كل مازادت المشاكل وزادت نسب ما انكرناه في يوم . صحيح بعض ماكنتم تقولونه ممكن سابقاً . لكن الحال اليوم تغير بس للاسف ماتغيرت وجهة نظر البعض نتاج هذا التغير .

واذا كان صديقك من صدقك القول وهو انسان وصداقه انسان .. فكيف نكذب على وطن وشوفوا مقدار حب الوطن وشوفوا ماقوى ذنب خديعته حتى بالقول ان انكرنا شي حاصلاً فيه .

واقـعــ وعلى قولة صورة .. لانخبي رؤسنا مثل النعام ونقول ماشفنا شي ــي ،،

[صريح]

تحياتي للجميع
اخت صوره ..هذا المجتمع يرى في نفسه انه مجتمع منزه عن الأخطاء...هناك أخطاء.. لكنها في مجتمعات اخرى..وليست في هذا المجتمع "مجتمعنا"..فهو مجتمع كامل وصافي ونقي ومنزه عن كل عيب و خطا..كيف وهو مجتمع الحرمين ..ونور الاسلام..ومهد الحضارة..ومنبع الطهاره...كيف وشعب هذا المجتمع هم شعب الله المختار...إذاً.. لا توجد أخطأ وعيوب في مجتمعنا..وحتى لو وجدت فهي لا تعتبر أخطاء و عيوب لأنها في مجتمعنا..

هناك اخطاء وعيوب ومشاكل كثيييييره في مجتمعنا...
نسب الطلاق..نسب الانفصال..الانتحار..العيادات النفسيه ومستشفيات الصحة النفسية تكتظ بالآلاف..الجهل والخوف والرهبة من العالم خارج حدود المنزل والقرية والمدينة..الجريمة والسطو والاختطاف..الزنا..والاغتصاب.. التدخين سلوكيات الشباب الخاطئه من مغازلات..وقنوات جنس وتدخين وشرب..
المقاهي تكتظ بالعاطلين وبالمنظمين.. الرشوة..السرقة..سرقة المال العام واختلاسه..عاهات اجتماعية ونفاق اجتماعي..و..و..و..وغيرها الكثير من المشاكل والاخطاء والعيوب في مجتمعنا..,مع ذلك يصرون القول اننا مجتمع منزه عن كل عيب وعن كل خطأ ..وكأننا شعب الله المختار...

ومجتمعنا له سياسه وعادات وتقاليد يمشي ويعيش عليها..يرفض الحوار يرفض النقاش يرفض الواقعيه والمصداقيه والصراحه..وكل من يشذ عن هذه القاعده ويحاول ان يفكر او يناقش..يعتبرونه علماني كافر مرتد لأنه شذ عن قاعدتهم..والتي غالبا ما يربطونها بالإسلام..والإسلام بريئ منهم ومما يفعلون

مثلا..من اتهموهم بالعلمانيه..
د.غازي القصيبي حاول ان يفكر ويناقش بصراحة ومصداقيه..فاتهموه بالعلمانيه و كفروه و أخرجوه عن ملة الاسلام..ونفوه خارج البلاد..!!!

وأيضا الأستاذ عثمان العمير صاحب مجلة وموقع ايلاف..اتهموه بالعلمانيه وانه كافر خارج عن الاسلام ..وهو الان يعيش خارج هذا المجتمع..!!!

ومن الامثله القريبة .. مسلسل طاش ما طاش.. كفروا جميع من يعملون فيه و اتهموهم بالعلمانية..ونشر الفساد والرذيله في المجتمع..!!!

كل من يفكر ويناقش ويحاور بمصداقيه وجراءة وصراحه..ويشذ عن قاعدة هذا المجتمع..يصبح علماني كافر مرتد ويريد الفساد والانحلال لهذا المجتمع (الطاهر)..!!!!!!!!!

[cool girl]

اهلين صوره ...
انا معاااااااااااااك ومعااااااااااااااااااك ومعاااااااااك في كل كلمه قليتها .. يعني يخلون من فووق الله الله ومن تحت يعلم الله .. المشكله هنا انه هالشي هذا من اللي عايشين في هالمجتمع .. !! واصلا ماراح تنحل هالمشاكل ولا راح يتغير شي .. اذا كان في ناس كثار مثل اللي نقابلهم في حياتنا العاديه ؟

[spy]

صوره:eek:

[تركي]

اهلين صوره .... كيفك ؟

الآن الوضع تغير يا صوره والكل صار يتكلم عن الجرائم اللي تصير عندنااا بداية من الجرائم الأخلاقية إلى الرشوه اللي بدت تنتشر في بعض الدوائر الحكوميه ولا اعتقد الناس الان اصبحت تنكر هذا الشيء لأنه اصبح شيء موجود وشبه يومي نسمع في سوالف في التجمعات عن قصص حدوث مثل هذي الجرائم ...

فاتوقع يا صوره انتي علمك وخبرك قديم ... فالناس الان اصبحت تعترف وما عاد تقول هذا ما يصير عندناااااا بالعكس تقول .. عندنا هنا بلاووووي

ولكِ مني الف تحيه

[صوره]

اهلين اخوانى ...شكر لردودكم
شكرا يامنادى ..بس اللى بقوله ..مافى داعى للاشهار والتشهير بالجرائم ..بس لابد من جهات تعالج الخلل اللى حاصل ..علشان نخدم الاجيال القادمه ..
واقعى شكرا لردك الرائع اللى صورت فيه الحقيقه المجرده ..وفعلا عندنا الوضع اختل اختل اختل ..
صريح وفعلا انت صريح ..وردك يدل فعلا انك انسان تلمس ارض الواقع ..
اختى كول غيرل ...شكرا للرد ..وفعلا كلنا شايفين كيف احنا ما نحاول نواجهه انفسنا ابد ..
سباى وبعدين ..ياتحكى يالا ترد ياخى ..
تركى ..ارجو انك تكون انسان واقعى جدا وتلامس الارض ..لين اللحين التكلم عن الجرائم ما يتعدى الاستراحات والمجالس ..احنا نبى توقيف للحد لكل انسان يمد يده ..معاقبه الجريمه ..مو نشوف باكستانيه كل اسبوع ينعدمون ..وكأن الجريمه مستودره مع العماله ..ولولاهم ماعرفنا الاجرام..
معليش تركى اقنعنى اكثر ..

صـــــــــ شكرا لكم ــــــوره

[فن العشق]

.............................. .............................. .............................. .

كم أود .. أن أقول الكثير .. ولكن الحياء يمنعنى ..

,,

فى .. الصغر كنت أ حب أصدقائى كلهم ..

ولكن ,,,

بعضهم كان يعاملنى بجفاء لم أفهم له سببآ ..

وإن ,,

كان يوجع قلــــــــــــــــــــــــــــ ـــــــــــــــــــبى ..

و حين كبرت فهمت .,,

لماذا ,,

يكره ,, إ نسان .. إنسان .. أخر ..

,,,

أعجبنى .. رأ يك ,, و ا قعى ..

,,,

[spy]

أنا:eek: ..... لانك يبدوا لي ياعزيزتي انك لا تقرأين الصحف .
عزيزتي كل الذي ذكرتي موجود ولكن لم يتجاوز الحالات النادره فلم يتطور الامر الى الحد العلني و الخطر.
ببساطه لا يوجد مجتمع نظيف و خالي من الشوائب.
spy

[هلا]

هلا سباي

قصدك الإقتصادية (البروبقاندا ) اللي تكتب مانشيت طويل عريض عن موضوع يجيهم من الناس وتكون شكوى على اكثر الأحيان :)

يعنبو دارهم وين مراسلينهم وين صحافينهم

والا مايبون يدفعون معاشات :)

[spy]

أنا لم اقصد الاقتصاديه ... ولو كان قصدي ذلك فانا لا استحق لقب spy.
عزيزتي ماقصدته هو أنا مجرد نشر الموضوع في اي صحيفه أو مجلة يدل على وجود هذا الموضوع الذي تستغرب مس صوره عن تجاهل المجتمع لوجوده و تستنكر انهم يقولون أنه غير موجود .
عزيزتي
لكل مجتمع سلبياته و ايجابياته ولو اطلعتي على بعض المحاضر في شرط المناطق أو قضايا بعض المسجونين لوجدتي أن هنالك نسب من محاولة الاغتصاب أو الزنا سواء لسعوديات ( وهذا نادر) أو اجنبيات وهذا يشكل النسبه الكبرى .
تحياتي لك و للجميع فائق الاحترام.
spy

[صوره]

بنت نت ..ياريت توضحين لسباى ..انى كل يوم اقرا الجرايد ما اشوف فيها الا كلام يتكرر بشكل غير معقول ..مره بالسنه يطرحون موضوع ممتاز والباقى ملفات وموجوده وتنعاد ماعدا الاخبار اليوميه ..
اى صحف ..
سباى عزيزى ..انا اشتغل بمجال ملتصق بهذه الامور وهو مجال الصحه ..فاهم يعنى ايش ..يعنى تجينا حالات غريبه عجيبه ( تعذيب _ تعذيب اطفال _ اغتصابات _ تشويه اجسام ووجوه _ طعن _ ضرب نار ) طيب هذول مين يفزع لهم ..
لما وحده اخوها يجيبها ضاربها لين ما مسبب لها عاهه مستديمه ولا يسالونه ليش سويت كذا فيها لمجرد انها اخته بس يعطيه كل الحق بتعذيبها ..
وطيب حتى لو اخطت مو هو اللى يعذبها ..فيه جهات مسئوله ممكن يشكيها او يروح لكبير العيله على الاقل ..
هذا اللى اقوله ..ان فيها ناس مساكين مثل الاطفال الابرياء لما ابوه يجيبه محرق جسمه بالسجاير ..والاب هذا اصلا انسان غير طبيعى ..والام علشان ترضيه تخليه يعمل اللى يعمله لانها خايفه على نفسها قبل اى شي ..
هذا الطفل مين يساعده مهو بيطلع انسان مشوه ..مريض نفسيا ..عبء على المجتمع ..هذا اذا قدر ينجو بنفسه ..
هذا اللى اقصده ..مو واحد ذبح واحد ..هذا بكيفه الحد وبيقام عليه ..
فهمت ولا لسه ..انا اقصد المساكين اللى مو لاقين يد رحيمه تمتد لهم ..


هذا اللى اقصده ..ان لازم تكزن بقلوبنا رحمه ناحيه الناس اللى موقادرين يطلبونها مننا بسبب الخوف اوغيره ..

صــــــــــ بس لابد من المثاليه ــــــــــــــــوره

[spy]

عزيزتي صوره
احترامي و تقديري لاحساسك الرقيق .
سباي

[صوره]

هقوتك عاد ...

شكرا ياسباى

صــــــــــــــــــ انت والله اللى احساسك رقيق ــــــــــوره

[هلا]

وش أوضحين

منتي وضحتي وخلصتي

يعطيك العافيه :)