][ حــيــرة مــحـــب ][

[** ديـــــم **]

:h: انا آسفة جداََ جداََ جداَََ اذا كنت مقصرة معكم في مشاركاتي و علشان اراضيكم هذي هي وحدة من كتاباتي على شان خاطر الغالية
** قطرة_ندى ** حسب ماطلبت مني وآسفة لو جت متأخرة
و ان شاء الله تنال على اعجابكم :h: :

هذي هي يا ناس حالي ...
صرت محتارة و سهرانه ...
صرت اقعد ايام و ليالي ...
مدري افكر في زماني و الاّ زمانه ...
مدري والله وش اللي جرالي ...
حتى ورودي من الحيرة ذبلانه ...
و كل ما اسرح في لحظة و يتهيّالي ...
طيفه تزهر في قلبي من الحب اغصانه ...
حتى لمّا احاول اتغاضى عن قلبي و ما ابالي ...
تخونّي و تروح له ولهانه ...
يا ناس ليش مكانته في قلبي عالي ؟؟ ...
مدري قولوا لي بالله امانه !! ...
بس اعرف انه ياكثر عذّاله و عذّالي ...
يخلوني من الهم و الحزن ندمانه ...
يبون يصير قلبي لهم خالي ...
و عشانهم احاول نسيانه ...
بس انت اول الناس في قلبي و التالي ...
فهّموني وشلون ابنسى من اعشق اوطانه ...
يا عاذلين افهموني اتركوني في حالي ...
انا مهما كان تراني انسانه ...
يا ناس انا من جروحكم لي ما ابالي ...
و هذا هو الدليل و برهانه ...
هل حبي له مقداره كذا غالي ؟؟ ...
بس يمكن اشجاني تكون ضيّعت عنوانه ...
بعد كل هذا بالله عليكم في حيرتي جاوبوا لي ...
ترى يمكن اكون في ظنّي له غلطانه ...

:h: عسى عجبتكم ؟؟ و اتمنى تجاوبوني بكل صراحة وآسفة لو كان فيها اي قصور او عيوب ترى هذي اولى كتاباتي الشعرية ...:h:

[خالي المشاعر]

السلااااااااام عليكم


بحسب ما طلبتي فانا بصارحك


كلام يعبر عن الاحساس الي في داخلك

اختي ديم تسلم يدينك بس ولو انه شوي فيه بعض الكسور ماهو بالوزن باللحن وعلى ما قال سيد شعراء النبط والخواطر الامير الشاعر خالد الفيصل

( العيب في القصيده اما من كسور بالابيات او من الاخطاء الاملائيه او من رداءة القرائه في الي يقرهااا)

ولكي جزيل الشكررررررررر

محاوله رائعه واتمنا المزيد

ماعليششششش تفلسفت

[رشفة قهوة]

تسلمي ديم عيوني والله كلام رهيب الف شكر...

[مالي خلق]

هلا بديم هلا والله

من طول الغيبه جاب الغنايم

واحلا غنيمه اللي جبتيها معك في النادي

بس والله من زمان عنك ويا هلا فيك :)

[تركي]

مدري والله وش اللي جرالي ...
حتى ورودي من الحيرة ذبلانه ...
و كل ما اسرح في لحظة و يتهيّالي ...
طيفه تزهر في قلبي من الحب اغصانه
==========

كلمات مليئه بالآحاسيس والمشاعر منك يا ديم
وبعيد عن الكلام في الوزن والقافيه ... أبدع قلمك في وصف حيرة المحب
بدايه و محاوله رائعه منك يا ديم ...... كملي مشوارك في الإبداع

والقصيده هديه منك والا اروع بمناسبة رجوووعك ...... النااادي مشتاق كثير لقلمك
:)

[دايم الحب]

هلا اختي ديم بدايه رائعه وموفقه وصراحه كلامي يعجز عن وصف جمال كلماتك ;)



ومشكوره وبالتوفيق انشالله:)

[** ديـــــم **]

:) اهلين بـ خالي المشاعر ومشكور ياعيوني
على صراحتك .. ورايك اللي اعتز فيه ..


:h: هلا حبيبتي توكس والعفووو يالغالية ..

:) هلا والله وغلا بـ مالي خلق ..
وتسلم يالغالي ..
هذا كله من ذوقك ياعيوني ...
والف شكر على ردك الغالي ..

:h: هلا بالغالي تركي وتسلم ياعيوني
كله من ذوقك .. واهم شئ انه القصيدة
اعجبتك .. لان انت من الاشخاص اللي
رأيهم يهمني .. ومشكور على الرد ..

:) هلا والله وغلا بـ دايم الحب ..
تسلم ياعيوني .. والحمد الله انه
اعجبتك القصيدة .. هذا اللي يكفي ..

[**قطرة_ندى**]

اولا اسفه ياعيوني على هالرد المتأخر

بس السبب انقطاعي عن المنتدى واعتزالي بس رجعت ياغاليه

واشكرك لتلبية طلبي ياعمري

وتبين الصراحه القصيده احساسها رائع

ووصفك اروع فيها بس مثل ماقال اخوي خالي مشاعر

فيها بعض الكسور مع ان ماعندي خبره بهالمجال

بس واضح عند القراءه وصدقيني مو مهم الوزن

المهم الاحساس الرائع اللي يخرج من القلب ويوصل للقلب

وابداعك لن يقف هنا فانا اطمع بالمزيد من احساسك

واسفه اذا كنت ثقلت عليك ياغاليه

بس من زود حبي لك ولذوقك

وصدقيني بمجرد اشوف اسمك في القصيد

ادخل بدون تفكير لاني عارفه ذوقك اللي لا يعلى عليه

مشكوووووووره الف شكر وكل عام وانتي بالف خير:)

[الرومنسي]

ماشاء الله عليك ياأخت ديم ، لديك موهبة ممتازة في كتابة الشعر ، يعطيك العافية وبالتوفيق إنشاءالله ;)

[مجموعة انسان]

اختي الفاضلة / منار..

قصيدة رائعة تشكو حال المحبين وبلاشك كما قالت اختي قطرة ندى المهم

هو الإحساس في القصيدة.....

القصيدة تكون رائعة اذا كان فيها إحساس وبالفعل كلماتك مليئة بالإحساس

وإن كان ينقصها بعض الوزن فلا يقلل من روعتها وجمالها......

اشكرك على أسلوبك الرائع ومحاولتك الجيدة وأن شاء الله مع الكتابة والقراءة

سوف تتقنين الوزن والقافية وهذه بداية الشعراء والمبدعين هي الثقة فقط..

فاكتبي واكتبي وكوني واثقة من كتاباتك وغداً سوف تبدعين وتتميزين..

ختاماً تقبلي خالص تقديري واحترامي.....

:bh: مجموعة انسااان :h: