قريت اليوم ..شى يزعل ..

[صوره]

قريت اليوم باحدى الصحف المحليه المشهوره بالتغطيات ..والمواضيع الساخنه ..
يقول المقال ان بعض الطالبات الجامعيات بجده ماحصلو وظايف ..فلقتل الوقت ورغبه منهم بتحسين اوضاعهم الماليه ولعدم حصولهم على وظايف تاكلهم عيش ..قرروا انهم يطبخوم سنبوسه وطرنبه وكنافه ويبعونها على اهل المطاعم والبسطات فى شهر رمضان وان التعاون اللى بينهم وبين اصحاب المطاعم والبسطات ادى الى ثقه متبادله .. ورغبه منهم بالحصول على اموال تساعدهم على شراء ملابس ومستلزمات العيد .. انتهى الموضوع .
الفكره مو جامعيه ولا اميه..الفكره هل انتهت الاعمال لدرجه ان الوحده تطهو ببيتها وتبيع للمطاعم ..
بس كذا المطاعم تكون مخله بشروط البلديه والصحه ..ان العاملين فيها بس هم اللى يطبخون ..وهذا شرط اساسى ..للمحافظه على الصحه العامه ولو لاقدر الله صار تسمم تصير مسئوليه المطعم ميه بالميه مو يروح يجرجر الناس معاه ..
الشى الثانى ..صرنا نفتقد وبقوه الاسواق الخيريه اللى تقام للاسر المنتجه ..واللى يعرضون فيها بعض الاعمال التطريزيه والفنيه والطعام واشهرها المخللات ..وهذى المعارض تحفظ للاسره كرامتها وبدل مرمطه اصحاب المطاعم والكسب اليسير ..يقام بشكل دورى معرض لهم يساعدهم على مدخول مادى ..وتكون نسبه المبيعات للقائمين على المعرض ..
لان صعب على انسانه فقيره انها تأجير محل وتجيب تصاريح من البلديه ..وديكورات وموظفين ..بس من السهل انها تصنع ببيتها وتروح تشارك بمعرض ..تأجر طاوله مثلا بخمسين ريال او ياخذون نسبه من المبيعات حقتها ..10 بالميه مثلا .. وكذا يكون افضلها .. وبدل ماهالصالات مفتوحه على قل سنع على الاقل يصير لها سنع ...
على فكره انا مره حزينه لحاله التردى اللى احنا فيها ..

صــــــ لاحول ولاقوه الا بالله ..وين التكافل ــــــــــــــــوره

[بنت نجد]

بصراحة الموضوع هذا يزعل

لاا ويقهر بعد

بعد الدراسة والسهر والتعب آخرتها بسبوسة

ياخسارة شبابنا بس

صحيح الشفل مو عيب بس هذي مسؤوليه ومخاطرة بنفس الوقت
ياليت المجتمع ينتبه لخطورة الوضع :( :( :( :( :

[المميز]

اي والله يابنت نجد حسافه على شبابنا

عاد توصل للهالدرجه انهم يبيعون للمطاعم بسبوسه وسمبوسه

والله حسافه

والله حسافه



والله حسافه


وشكرا ياصوره على طرح هذا الموضوع

[bader_15]

احب اقول راي في الموضوع وهو انه اذكر انكم تدعون إلى العمل الشريف وهذا من ضمن العمل الشريف اما سالفة هي او هو جامعي او جامعيه فهذا نصيبهم وهذا اللي مقدر لهم في الحياة .. بس يقولون وش اللي حادك على المر قال اللي امر منه يعني تسوي الاكلات وتحصل لها قرشين ولا تصير عاله او تشحد ... اما من ناحية الاسواق الخيريه فأنا معك فعلا محتاجين لها بس عاد وين اللي يسمع ويحس والا بس حنا جايدين بمساعدة الفقراء اللي بالخارج مع ان اللي بالداخل يستاهلون اكثر .. على كل حال هذا راي وسلامتكم ..

قاعدتي الجديده في الحياة >> تحياتي واشواقي إلى كل من يعاديني ** وابعث له سلامي وتمنياتي <<

[بنت نجد]

صحيح اخوي بدر هذا عمل شريف ولا عليه غبار

بس حنا خايفين عليهم لايتورطون بمشاكل هم في غنى عنها

وياليت تكون هناك اسواق خيريه تهتم باالموضوع




باالنسبه لقاعدتك الجديدة باالحياة تراها اعجبتني ;)

[متيم]

يعجبوني ازين مما يفكرون تفكير غلط:(

[موعد]

ودي اقول رأيي بصراحه مابعدها صراحه بس خايف

[صوره]

لا وش ذا
كذا ياموعد ما تقول رايك ..طيب وراك متردد ..لا قول ..نبى نسمع رايك..
اوكى ..

صــــــــــ نسمع رايك ــــــــــــــــوره

[كحيلان]

مرحبا اختي صوره :

بالنسبه لموضوع عمل الطبخات وارسالها للمطاعم ما ارى من وجهة نظري اي عائق في هالموضوع لانها تعتبر سعي لكسب الرزق وهذا شئ مشروع وما فيه شئ .

اما بالنسبه لموضوع الاسواق الخيريه فأنا معك 100% في هالموضوع وهذا شئ يجب ان يطبق ولا يكون في المناسبات فقط كرمضان او غيره بل يكون على مدار السنه هذا بالاضافه الي كلامي سابقا في موضوع اخر عن وجوب الاكثار من الاسواق النسائيه والتي سيكون لها مردودها الايجابي في الكثير من الامور .


وبخصوص ان المطاعم تكون مخله بلقوانين وشروط البلديه وان عماله المطعم هم الذين يجب ان يقومو باعداد الوجبات وما الي ذلك ...

اقول ياليت مطاعمنا المؤقره ما تخالف الشروط الا في هالناحيه فقط ومن زين عماله هالمطاعم اللي عندنا الحين والله انها تحوم كبدك اذا شفتهم خصوصا الناس اللي لهم تدخل مباشر في اعداد الاكل .... وبعدين اي بلديه واي صحه الله يعافيك اللي تتكلمين عنها ؟؟؟؟؟؟

والله يهالبلديه خصوصا المختصه بالتفتيش (والله من زين التفتيش بعد ) مانعرفها الا بالاسم وان وجدو يمر له خمس دقايق كنه ملحوق يناظر المحل كنه يهوجس ويطلع هذا تفتيشه .

والدليل شوفي حالات التسمم اللي تصير بالجرايد هذا اللي نقدر ندري عنه بس واذا اكتشفوه تسكير المحل وغرامه كم الف وبس ؟؟؟ والعالم اللي تسممت تنطق بالمستشفى الين تطيب .

واذا كنتي خايفه عليهم من انه يجيهم شئ ابد لا تخافين مو فيها مخالفه عماله المطاعم مهوب معلمين
التسمم عندهم اهون .......

;) ;) ;) ;)


وانا اكثر ما يرفع ضغطي هالبسطات المكشوفه صحيح ان ماهنا بعد عن بعض المطاعم بس هذي عيني عينك مكشوفه وتقول باعلي الصوت وينك يا تسمم وهالعالم ما عندها مشكله تاكل اي شئ ... شوي وعي صحي ياعالم .


وتحياتي للجميع .......

[صوره]

عز الله ما كذبت ياكحيلان :roll:
البلديه عندنا زى قلتها مهم مرتاحين الا اذا جاء وباء وحصدهم قبلنا ..
على البسطات فعلا ترفع الظغط ..
وتذكر موضوعى عن الزبايل الله يكرمك ويكرم القارئيين .. اللى خلانى اكتب هالشى انه فعلا ما بيدنا حل ابد ..
ماقول الا ياشكوى لله ..

صــــــ ياشكوى لله ــــــــــــــوره

[هلا]

تكفين ياصوره لا تجيبين طاري الزبايل

هذولا جماعتك يوسخون

وبخلون الدنيا مزبله ويبون البلديه تشين من وراهم مثل الشغالات في البوت

لو كل بني آدم حافظ على النظافه بينعدل وضع النظافة عندنا والتغريم يشدون

حيلهم فيه وأي احد يوسخ او يرمي زبايل بالشارع بطريقة غير حظارية يتغرم

بيعرف ان الله حق

والعمالة اللي توسخ يتغرمون جيزهم جيز غيرهم

بلاك هلاعماله اللي حايسه الدنا حو من وصاخه وقرف :(

[موعد]

والله ودي ياصوره اقول رأيي بصراحه بس الكلام بيجر بعضه وبندخل في السياسه والاقتصاد والبطاله والكلام اللي يوجع القلب ويرفع الضغط .. خليني ساكت احسن .. انتو ماقصرتوا قلتو المفيد ..

[صوره]

والله يابنت نت ..جماعتك كذبو الكذبه وصدقوا انفسهم ..
جتهم كم فلس على بالهم بيصيرون فيها اودام ..اى نعم شرو كل شي بفلوسهم بس فبه اشياء ما تنشرى واهمها النظافه والاخلاق ..
وهذا بلا ابوك ياعقاب ...نفكر ونفكر ونلاقى النتيجه ان كلن صام اذانه بحجه محد عليه منى ..
وياموعد ياخوى وش بلاك ممتر ..وش ذا اللى انت فيه ..ترا ياقليبى الدنيا ما تسوى هذا كله ..
بس اذا الامور بتتطور زى ما قلت ..لا ياخوى خلك راكد لان شكلك شايلن غثا الله اعلم به ..ارتاح وانا اختك ..

صــــــــــ روقوا ــــــــــــــــوره

[موعد]

لا والله مافي قلبي غثا ولا شي الحمدلله رب العالمين على النعمه الفضيله والله لايغير علينا .. انا قصدي فيه مواضيع قبل مانقول رأينا فيها لازم نحللها بشكل منطقي واذا حللنا مشاكل من هالنوع بندخل في أمور لها أول مالها آخر .. مثل ماقلتي الركاده زينه .. شوفيني راكد شحلاتي :)


موعـــــــ صوره شلون يعني ممتر؟ ــــــــد

[صوره]

موعد ياخوى ..والله فاهمه وش بتقول ..
بس ممكن تمسك الموضوع بدون تحليل عميق والسبب ان كثير ما ارح يفهمون القصد وحيقرونه هجوم والسلام ...
عموما اعتز برائيك ويشرفنى وجودك بالنادى جدا ..
وكلمه ممتر مو جايه من مر وهذا دوا اهل اول ينقعونه ويشربون منه كل يوم مثل الحلتيت والعشرق بس المر ثبت له فوائد جمه ..وفيه مثل يقول ( ما يسهر بالبيت حر وفى البيت مر ) يعنى مستحيل اى انسان يحس بالام بالليل واذا كان فيه دوار المر ..بس كلمه ممتر جايه ..من ان الانسان اذا حس بمرار وحس ان الامور مو تمام ( يتغلق يعنى ويحس بمراره بجوفه ) ومن هنا جت كلمه ممتر عند النجديين ..يعنى تحس بالمرار ..والالم .. وان الامور ماشيه باتجاه معاكس لك ..فتحس بطعم المرار .. وعساك فهمتنى لانى صايره اودى الناس اشواط يالله فى حجاك ..بس ماقلت لى اخوى موعد من وين انت ؟؟

صــــــــ شكلك مو من الرياض او جديد فى الدنيا ــــــــــــوره

[مجموعة انسان]

مشرفتنا الفاضلة / صورة...

اسمحولي ان اعطيكم رايي في هالموضوع واتحدث بصراحة متناهية..

طبعاً احنا نجد الناس يقولوا وين الوظايف وليش وماليش.؟!..

راح اتكلم معاكم بوقائع حقيقية بعيداً عن عواطفنا...

بالنسبة لأعدادا المواطنين كل سنة في تزايد وهذا امر مفروغ منه نهائياً..

بالنسبة للوظائف الحكومية باعتقادي صعب جداً أنها تغطي هالكم الهائل

من أعداد الناس بل مستحيل جداً......

اذن من هو المسؤل في ذلك ؟!

مع الأسف الشديد لو التفتنا للقطاع الخاص واعني به

أصحاب الشركات الخاصة لوجدنا أن نسبة الموظفين غير سعوديين..

ولو راينا شروطهم التعجيزية والهدف منه تطفيش الناس او المواطنين بشكل

عام , اختي مع الأسف الشديد أن الوظائف الرجالية والنسوية في القطاع

الخاص حوصرت حصراً شديداً وضيّقت الحدود فيها بالرغم من أن الدولة تسعى

جاهدة لسعودة الوظائف في القطاعات الخاصة ......

المسؤل الوحيد والمباشر هو رجل الأعمال السعودي ...

الذي مع الأسف الشديد يبحث عن الموظف الأجنبي وذلك لأن كلفته أقل

وهذا بلاشك ياثر تأثيراً مباشراً على المواطن السعودي......

قبل اسبوعين رايت أحد المقيمين يعرض علي عرضاً مغرياً

ويريد فقط ان يفتح محل باسمي ويعطيني شهرياً 3000 ريال ومن ثم

ياخذ دخلاً لايحلم به مديراً عاماً.....

الآن وضحت لكم الأمور مع الأسف الشديد أن وراء ذلك هم الذين لاتهمهم

مصلحة المواطن السعودي ولايهمهم غير الربح المادي واعني بهم التجار

الذين فقط ينظرون لمصلحتهم الشخصية وبلاشك سبب ذلك هو الطمع ولا غيره

فلو كل تاجر من التجار وكل شخص فكّر في مشروع تجاري ..لو كان هؤلاء

لديهم وطنيه لما انتشرت البطالة هكذا والدولة لم تقصّر معهم وفرضت عليهم

السعودة ولكن مع الأسف لا تظل الأمور تسير حسب تلاعبهم ومراوغتهم...

سوف اذكر لكم بعض الألاعيب التي يتلاعب بها أصحاب الشركات والقطاعات

الخاصة بعد أن فرضت عليهم الحكومة السعودة في شركاتها....

فماذا يفعلون ؟!

يقبلون بالمواطن ثم يوظفوه لمدة اسبوع تحت التجربة وبعد ذلك يرسلون

بياناتهم لديوان الخدمة المدنية بمعنى كي يشاهدوا التزامهم بتوظيف

السعوديين وبعد ذلك يطفشون هذا الموظف المسكين وبعد أن يتركهم

يظل اسمه موجود من ضمن الموظفين!!....

باختصار شديد إن المسؤول الوحيد هم التجّار الذين ليس

لديهم وطنيه واغراهم الطمع والربح المادي والعياذ بالله....

فأتمنى أن تدركوا ذلك جيداً وكلامي هذا ينبع من تجارب ووقائع شاهدتها

بنفسي فالحكومة لم تقصر في اتاحة الوظائف ولكن امام هذه الأعداد الهائلة

أين دور اصحاب الشركات والمحلات الخاصة ؟!!

اسال الله السلامة وأن يبعد عنا الطمع والجشع والعياذ بالله وليعلم كل انسان

أن الله سوف يحاسبه وأقصد بذلك من سمحوا للأجانب بالعمل وجعلوهم

يمارسوا نشاطهم ويزالوا التجارة بحرية تامة مقابل إعطائهم مبلغ يسير مقابل

أرباح هؤلاء الأجانب .......

انظروا إلى المطاعم ...انظروا من أصحابها الحقيقين.....لاتخدعكم اسماء

اصحابها فهؤلاء كالغنم يضعون اسمائهم مقابل راتب شهري يسير !!!

والربح الحقيقي يذهب خارج الدولة ليؤثر على اقتصاد البلد....

النتيجة :

هو الربح المادي يذهب خارج الدولة وبلاشك أن هذا يؤثر على اقتصاد البلد.

بعض الحقائق :

احد المقيمين وهو هندي الجنسية..

يحصل على دخل شهري 15 الف ريال تخيّلوا ذلك....

وهناك الكثير من الجنسيات يحصلون على اضعاف أضعاف ذلك!!!!!!

الى كل صاحب تجارة وشركة اتق الله في نفسك وخاف ربك

وجعل دقيقيك في ارضك واقولها انت مسؤول يوم القيامة عن هؤلاء الشباب

فلا حول ولاقوة الا بالله العظيم......

:bh: مجموعة انسااان :h:

[موعد]

وجودي بينكم هو اكبر شرف لي اختي صوره ومشكوره على التوضيح ..

انا من هالبلد الطيبه الله يحميها ويعزها .. اصولي نجديه انولدت وتربيت ودرست في الشرقيه يعني تقدرين تقولين علي "شرقاوي مهجّـن" .. لكني احن كثير لنجد وترابها وشوارعها ومساجدها وامنيتي اني اندفن فيها ..

شكرا مره ثانيه للتوضيح

[صوره]

هلا اخوى مجموعه انسان ..بصراحه رايك قمه ..فعلا حطيت ايدك على الجرح الغائر اللى نعانى منه ..وهو عدم وفاء الغنى السعودى لبلده ..
للاسف شي يضيق الصدر ..شباب زى الورد مقبلين على الحياه تقابلهم احباطات مالها بدايه ولا نهايه ..شى مؤلم ومؤلم جدا ..
شكرا لرايك الرائع المفيد ..فعلا حسيت انى استفدت من انسان صاحب فكر مستنير مثلا وملم بالامور بشكل عميق جدا ..

اخوى موعد ..هلا بيك معانا اخ وعزيز وغالى ..
واعتبر النادى لك ولكل الاعضاء اللى دايم يتحفونا بمقالات رائعه ان دلت تدل على ان الشاب السعودى لازال بالف خير .. والنماذج السيئه ماهى الاغبار اول ما ننفضه راح يطلع النوع الممتاز اللى فعلا يشرفنا وجوده واننا نسمع رايه وفكره ..

صــــــــــــ النادى لكم اولا واخيرا ـــــــــــــــــوره

[موعد]

شكرا اختي ..