اه يالذل والقهر

[porsche911]

اولا بسم الله الرحمن الرحيم

ثانيا انا شفت انواع ذل وقهر واهانة بس زي الحيوانات اللي بشركة الاتصالات الله يدمرها انشاء الله ويجعلها تفلس ( بس ماهقوتي انها تفلس بوجود نوعية ماكلمت خويتي وماكلمت خويي )

المهم نرجع لموضوعنا : عندنا بالبيت زي كل الناس بالعالم تلفون وفية صفر دولي ومحلي علشان اذا انا برا والوالدة الله يخليها لي يارب تبي شي تكلمني واجيب لها اي شي .

المهم ذاك اليوم كلمتني الوالدوة من جوالها تقول ياولدي قطعوا الاصفار من البيت ، انا سعودي ، فما تأثرت بقرار ال 2500 ايداع قبل المكالمات واللي عنده اصدقاء مو سعوديين يسالهم ويشوف اش صار لهم .

طبعا كلمت ال 907 اللي والله مايدرون وين ربي حاطهم فية وقالي هذا فصل من الاشعار المبكر اقول ليش يقول مادري كلمهم بكرة الصبح ويعلمونك ( الحمار موضف واجهه ويقول مادري )المهم ثاني يوم من الصبح للعصر وتلفمن الاشعار الله يحييهم مشغول ، كلمت 907 وقال لازم تروح للمعذر لاحظوا معاشاتهم من ظهورنا ويذلونا روحوا تعالوا . المهم على صوتي وعلى صوتة قال والله مادري بس هذا قرار جديد قلت لة متى طلع قال لي انت ماتقراء جرايد .

تصوروا ماهم مكلفين نفسهم انهم يشعرون المشترك اللي مغلوب على امرة ويقولون له كمان اشتر جرايد

طيب انا ماحب الجرايد وش اسوي.


ولازال الصفر غير موجود مع اني سددت

وصدق عادل امام يوم قال ساتسدد يانشيل العدة مع العلم ان ماعنديش تلفون

يعني مشاكل مصر قبل 30 سنة اللحين بدت عندنا يلعن ابو التخلف

وابشركم مصر الانترنت ببلاش


يالله يارب ان شركة الاتصالات تفلس بس ماهقوتي زي ماقلت لكم بوجود اهلين ، كيفك ، وحشتني والخ الخ الخ


اههههههههههههههههههههههههههههه ههههههههه يادبي

ياديرة الحي

وانشاء الله سنة او ثنتين وباروح اعيش بدبي او موريتانيا

تقولون ليش موريتانيا لاجوال بالويك اند ببلاش بموريتانيا


الله كريم

[$ماريا$]

:roll: :roll: :roll: :roll:

[وآقعي]

آمين جعلها تفلس ..
تراها طالعة من قلب :bh:

يعنبوا شيطانهم انا اول مره اشوف شركة آخر ماتفكر فيه هاللي منه تجي رواتبهم ..
والله يابورش وماحديتني على يمين ..((ماصدقت القى موضوعك علشان افضفض شوي))

ادق على رقم شقة كنت مستأجرها لسعة الصدر تعرف مافيه مانروح له في هالرياض .. المهم ادق عليه عقب ماسددت كامل فواتيره ويرد علي رجال مادري منهو .. اقول من انت يقول فلان الفلاني اقول وش جاب تلفوني عندك قال وصيت على تلفون ونقله لي واحد معرفة .. قلت وهالمعرفة مالقى إلا تلفوني ينقله لك .. كل هذا خله على جنب مو مهم تصير كثير .. المهم راجعت شركة الانفصالات وتدري وش صار .. طلعوا لي آخر فاتوره واحدثها بأسم الرجال .. ولما شيك في الجهاز الاسم اسم الرجال ورقم بطاقة الاحوال رقمي أنا .. ياعمري على خرابيطهم .. قلت طيب (هل كيف) وصلتني فاتوره منكم ورفضت اسددها .. (هل كيف) انا كلمتكم وقلت لكم خلاص تلفوني هذا الغوه ..
اللي حصل اني سلمت الشقة .. لكن مو معناة اني اسلم الشقة اني اسلم التلفون .. يمكن بنقله لشقة ثانية يمكن بنقله للبيت عندي يمكن برجع للشقة .. لكن هالرجال شاف الشقة سلمت .. او هالاتصالات شافوا ان رقم هالهاتف ماعليه مكالمات لمدة شهرين وابراءاً للذمة إلى ثلاثة شهور .. قالوا مافيه احسن من هذا ننقله لخوينا ..

اللي يبرد على القلب شوي اني بالفعل ماني محتاج لهالتلفون وكنت ناوي اكنسله او انقله لصاحب البقالة اللي تحت في العمارة .. لكن المفروض وبحكم اني انا من سدد رسوم التأسيس ان التلفون يبقى لي لين افكر اتنازل عنه .

ووش ترجي في ناس موظفيهم يكشفون اسرار الناس وبياناتهم الخاصة للآخرين .. ولا كأنهم مسوين شيء .. عادي انت بس عطه لطالما تعرفه رقم جوال او ثابت وهو يعطيك من صاحبة ووين ساكن بعد ..

عموما انا لو بتكلم ماخلصت .. لكن ماقول غير يالله انك عارف بالحال وعارف كيف هالشركة لاعبة في الناس ومطبقة الاحتكار اللي حرمته في الاسلام .

يعنبوا شيطانهم تكلم ولا ماتكلم بتدفع بتدفع رسوم اخرى الله العالم وش معناها .. ولا والقهر لا قطعوا تلفونكم وهم من الاساس ماوصلوا الفاتورة .. ولا حركتهم الغبية والتأمين اللي طالبينه على النساء .. عنصرية مابعدها وتهميش لحق المواطنة ..

عمري كله ماعمري شفت ولا سمعت اسوأ من هالشركة شركة .
مالت عليهم ياجعلهم الخسائر والافلاس .. وآخرة سواياهم هالمسابقات اللي لاعبة في الناس لعب برقم 700 .. قمار عيني عينك وجع ..

[لمحة حب]

وأنا أضم صوتي لصوتكم يجعلها تفلس يارب وتقفل ماعاد نبي شركه خربانه من الأصل ..اي والله يحق لك اخوي بورش تعصب وتنقهر منهم جد هالشركه مره زودتها سرقه عيني عينك خدمه زفت معامله سيئه وفوق هذا كمان بعض موظفينها ربي يستر عليهم بس ..

عاد عندنا رقم بالبيت مافي صفر دولي ويوم جايتنا الفاتوره 2500 مكالمات خارجيه والتلفون مافي صفر اصلا اتصلنا على الشركه نستفسر ونعترض الموظف يقول مالي شغل في الكمبيوتر طالعه عندكم هالمكالمات نقول له مافي صفر يقول أدري ظاهر عندي بالكميوتر ..!!!
طيب كيف جايه هالفاتوره قالي مادري مو ذنبي انت سدد وبعدين تعال أشتكي اخوي يقوله كيف أسدد قاله مارح يشوفوا الشكوى حقتك الا بعد التسديد هذا النظام مالت عليهم وعلى نظامهم والله وسدد وجلس يراجعهم فتره الين حسبوا الفواتير بعد كذا كم شهر مدفوعه مسبقا ..

لا وفوق هالتخلف تجرب بنت تتصل وتطلب خدمه شوفوا الي راح تسمعه ايش دالال وعز تلقى منهم واهتمام مو بطبيعي ..
مره اتصلت ابي اضيف خدمه على التلفون المهم رد علي الموظف وسأل كم رقم الهاتف اعطيته الرقم قالي باسم فلان قل له ايوه قالي في عندكم مشكله في الرقم ومادري ألّف لي قصة وش كبرها قلت له طيب مشكور انا ارسل احد يراجع الشركه وقفلت كان وقتها الصباح رحت نمت بعد ساعه دق التلفون يقولي شركه الهاتف اقوله نعم قال انتي اتصلتي قبل شوي وطلبتي كذا قلت له ايوه قالي راح احاول احل المشكله نحنا نهتم بعملائنا كثير انا استغربت قلت من متى بيهتموا ويرجعوا يتصلوا المهم قفلت رجع بعد شوي رن التلفون يقولي والله حاولت لكن الموضوع معقد شوي لكن اشوف احد من أصحابي يحلها قلتله لا مشكور خلاص انا برسل احد يشوف المشكله وقفلت رجع اتصل ثاني يقول متأكده ماتبي أساعدك تراني تحت الخدمه قلت له اقول شكرا ومابي اسمع صوتك بعد كذا واذا اتصلت لاتلوم الا نفسك وقفلت في وجهه ناس ماتستحي هههههههههههه

بيعاكسوا عيني عينك كأن مو هالمعلومات والأرقام الي بين ادينهم امانه المفروض يحترموا فيها خصوصية المشتركين
اخوي طلب ينقل تلفونه لانه نقل من البيت اتصل الموظف ردت عليه بنت اخوي يقولها هذا بيت فلان قالت له اي هو قالها معكم شركة الهاتف فلان فلاني موجود قالت له بابا مو في المهم قالها انتو طلبتو نقل الهاتف قالت ايوه قالها بياخذ يومين نقله لكن ممكن ننقله بكره انشاء الله قالت له اتصل شوي يكون بابا جا البنت توها صغيره 13 سنه رد عليها قالها لكن انا ما ابغى الوالد ابغى اتعرف عليكي البنت خافت وقفلت السماعه رجع اتصل هزأته قالها اسف وماكأنني اتصلت وقفل ..

كأنهم بيقولو صابت صابت خابت خابت بيعاكسو البنات والي تعطيهم وجهه فرصه والي ماتعطيه خيرها بغيرها والله حاله ..

[porsche911]

مشكوري واقعي ودمعه على مشاركتكم وتخفيف الامي

ولكن ماقول الا عمار يادبي

اقول دمعه
عسى منتيب بنت وتبين شي من الهاتف


اخوكم البورش ;)

[لمحة حب]

:eek: :eek: :eek:
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بورش مافهمت

[porsche911]

اللي اقصدة
الله لايكتب لك حاجة هند الهاتف وتضطري تسويها بنفسك :(

[لمحة حب]

الان هذا قصدك هههههههههه

لا لاتخاف علي انا احب انجز اعمالي بنفسي والي محترم معي اكون بقمة الاحترام معه والي يفكر بشي كده ولا كده لاتخاف اعرف كيف اكون وقتها راجل وافرض احترامي عليه