من زين السواقة عاد ؟

[ناقه]

السلام عليكم يا جماعة الخير ،،

والله وحشني نادي النقاش .. ووحشوني الأعضاء وردودهم ،،

يا ناس أمس شفت في الشارع منظر نرفزني ... طبعاً المناظر اللي تنرفز عندنا واااااجدة بس عاد منب مثقلة عليكم إلا بواحد منها ...

شفت واحد يسوق سيارته ومعاه حرمته وعياله وحاط واحد من عياله في حضنه وهو يسوق ؟؟ عاد من زين السواقة يوم يحط ولده في حضنه ...

يعرض نفسه وولده والناس اللي في الشارع للخطر ... ليه ؟؟

والله من جد ليه ؟؟

انا اقولكم ليه عشان الناس عندنا مستهترة و من أمن العقاب أساء الأدب ...

ما فيه وعي ولا فيه إحساس بالمسؤولية ... زائد إن الرخص عندنا تنعطى والواحد قاعد يتقهوى في بيته ويتفرج على البرتقالة ...

ومع إن المرور حطوا نظام الإيقاف لمدة يوم لمتجاوزي السرعة المحددة .. وهو طبعاً قرار ممتاز وحسب ما أعرف إن المحسوبيات فيه غير سارية ولله الحمد...

بالإضافة لحملة " يكفي " ... كلها خطوات ممتازة ولو أنها جت متاخرة شوي لكن الاستمرارية أهم يعني الحملة بل ما تستمر شهر واحد لازم تستمر أكثر من كذا ..

لازم يكون فيه أكثر من مدرسة لتعليم القيادة ...و تكون مدارس مضيوطة ،، التعليم فيها لا يقل عن شهر كامل مثل ما تسوي الناس الصاحية ،، وما تصدر الرخصة إلا بعد امتحان ،، وإن رسب يعيده عساه يعيده عشر مرات المهم يفلح بالنهاية وما يطلع من المدرسة إلا وهو عبدالله با خشب ..

ولازم يعملون إحصائية بأسباب الحوادث ..

مثل السرعة الزائدة ،،
استخدام الجوال ،،
التدخين ،،
وضع الأطفال في عهدة السائق أثناء القيادة ..
التحدث مع الراكبين في السيارة والالتهاء عن الإشارات و التجاوز بالسرعة ،،
الالتهاء بالبحث عن اغراض شخصية داخل السيارة أثناء القيادة ،،

لازم كمان يفرضون وضع كرسي خاص بالأطفال ،، لمن لديهم أطفال رضع ،، وتغريم المخالفين ،،

كمان لازم يفرضون إن الأطفال اللي أقل من 12 سنة يجلسون في الخلف لحمايتهم من اخطار الكيس الهوائي أثناء الحوادث . " كل السيارات تقريباً فيها تحذير جنب مراية المقعد الامامي بأن الكيس الهوائي مؤذي وقاتل احياناً للأطفال أقل من 12 سنة " .. وتغريم المخالفين ..

تغريم المتحدثين بالجوال و إجبارهم على استخدام مكبر الصوت ..

وضع مواقف سيارات أمام الأماكن الحيوية بالتعرفة العالمية " عشان اللي مالهم سنع فيه هذاك المكان ما يضيقون على الناس اللي لهم حاجة " ..

وإيييييه والله يكفي ...
يكفي بربسة وحواق ،، والله أرواح ناس مو مزح ،،

انتو وش رايكم ؟؟

[Be*Maine]

ممممممـ رأينا مم
واحد وفرحان بولده انتي مالك ومالوه !

[KiT KaT]

عليكم السلام

هلا اختي نورتي القسم والمنتدى !!

بصراحه هالموضوع يضايقني كثير واشوف ناس مايهمهم مع انهم يعرفون اضرار هالشي

لكن ايش تبريرهم يقولون يعني موب توني اعرف السواقه صار لي 10 او 15 سنه اسوق

والبزر ممكن يشغل أبوه او ممكن يعبث في شي لكن هم من زود حبهم لعيالهم ممكن لو طلبوا يحذفونهم من الشباك بيسوونها

وهذا لاحظت عندنا في الخليج منتشر وماشفته في دول براااا والسبب عدم المبالاه

وفيه سبب ثاني يقولج ازعجني بصياحه بحطه شوي لين يسكت !!!!

مايفكر هاللحظه اللي بيحطه في حظنه ايش ممكن يصير

مافيه حل غير انا نربط يد الاب بالسكان عشان مايكون فيه مجال يحط الولد :d

يعطيج العافيه اختي ناقه

[حزن قديم]

النظام مفقود عندنا مو زي الدول الاوربيه عندهم انظمة وقوانين يمشون عليها ..
ومع كثر الحملات والاعلانات لأضرار الحوادث الا انه الحوادث كل يوم وقائمة ..

[بقايا جروح]

وعليكم السلام ورحمة الله وبركاته

هلا وغلا بناقه
وانتي اكثر والله
اي هالمواضيع الزينه ...من زمان عنها

والله كل اللي ذكرتيه صحيح
من أمن العقاب أساء الأدب..

هو لو يجيبون طاري الفلوس في المخالفات والله ليمشون زي ماتبغين

المصيبه انهم مايقلدون الاجانب الا باشياء تافهه
ياريتهم يقلدونهم باتباع الانظمه والقوانين..
ولويفكرون شوي بس يعرفون ان هالانظمه في صالحهم...بس!!!

يسلمو ناقه والله يعطيك العافيه

[دانة الظهران]

ياشينها اذا الولد مطلع نص جسمه من الدريشه وابوه مشووت !!

^ ^ ^
مو شي يقهــرر

دندونـهـ

[~m!ss*f@llen~]

ظاهراات التفنن بالسواقه وتعريض الناس للخطر
كثرررررررررررت وكلها بسبب الكبريااء الرجل
اذا احد قاله منت برجااااال .!! اذا ماسويت الشي الفلاني
خل علان وفلان ينفعونك لما يصيبك شي من قدر ربي
الصراحه الشبااب تووووحفه:happy:
هـــــــههههههههـــــــه
والله يخلي بابا بووودي ع الحملاااات ومدارس تعليم السواقه بكل شبر وبكل خط سريييييييييع ^^
والله يتممها خير ع اخوانا في الأسلام ويتوعون ويعرفون الخطأ والصح
مع ان مو كلهم كذا وانا اقدر واحترم اللي صاحي وعاقل وفاهم
وياالله بالخاتمه الحسنه والتوفيق عند رب العالمين
مشكووووووره ع الموضوع الحلو
,
,
,

[ناقه]

هلا والله وغلا أختي كيت ،،

هين لين قال 10 وإلا 15 سنة ،، بلاك لين قال له 45 سنة يسوق .. والمشكلة ما يعرف يدق إشارة !! ( ترى هذا سواقنا وراااااافع ضغطي ) ...

إسه والله إنك صادقة تلاقين الرجال مطلع اهله وهو قلبه مع الربع في الاستراحة ... ولا يبي أحد يصجه ولا يزعجه .. وإن قال الولد يبي يسوق مع أبوه لبا قلبه يسوق مع أبوه ... ومن الحب ما قتل ... لا حول ولا قوة إلا بالله ..

لا مبالين صح ! لكن لو انفرضت غرامات وحرتهم قريشاتهم ذيك الساعة بتلاقينه مربط ولده في السيارة كنه من الهنود الحمر ... ;)


مشكورة يا قمر على الرد ..:)


هلا والله بالحزن القديم ...

من جد ما فيه نظام ... كفاية خط البلدة والرعب اللي مسويه في الديرة ...
نعنبوه لين لف يمشي على كفرين ... !! مو طبيعي وضعه ... هذا غير الستارة طبعاً اللي صاكها ! يعني انتوا وخروا عني تراني لاف لاف ... هههه والله شر البلية ما يضحك ...!!

هلا وغلا بالآهات ..

يالله حيها يالله حيها ...

حنا شاطرين نقلدهم باللبس .. بالعطور .. لكن في الانضباط واحترام القوانين والىخرين وحتى احترام الوقت ... ما نعرف ... إلا مير عسى ما نخربهم يا شيخة ... تلاقين الأجانب اللي يجون هنا يتاخر عن الوقت عشر دقايق لانه عارف إن ولد الديرة اللي مواعده بيتاخر نص ساعة ...


هلا وغلا بدانة الظهران ...

المشكلة حتى الجو ما يساعد إن الواحد يطلع راسه من الشباك ... تلفحه ذيك السموم .. وإلا يلتفت عالسيارة اللي جنبه يلاقي راعين الليموزينات مفتحين ابوابهم .. وهاتك يا تفافيل في الشارع الله يكرمكم .. يعني مناظر مسيئة بصراحة .. وع !! :(

مشكورة على الرد دندونه ...



هلا والله ~m!ss*f@llen~ ..

متنا من ذا الكبرياء متنا !!! المشكلة إنها عناد مب كبرياء ...
أخبر الكبرياء يخلي الواحد ثقيل .. مب يحدحد بنات خلق الله ويسقط عليهم ويسبب لهم عاهات مستديمة بس عشان تاخذ الرقم ...

يا شيخها خليها على الله بس ...

على طاري الكبرياء .. احلى فيلم عنه اسمه حب وكبرياء حق نجلاء فتحي ومحمود ياسين ... من كلاسيكيات السينما المصرية .. اللي ما شافه لازم يشوفه ..:)

والف شكر على الردود الحلوة ...

[Doodat Algz]

انتو وش رايكم ؟؟

والله راينا انهم يسمحون بقيادة المرأة للسياره ويفكون انفسهم من بلاوي هالرجال اللي لها اول ومالها تالي
لان حنا يالحريم لو سقنا نمشي بسبيل حالنا مانهتم لحد حولنا الين ماناصل للمكان اللي نبيه
بينما الرجال لو ساقو اول شي اهلهم مايسلمون من المنافخ وثانيا طوله ماهو راكب بالسياره يسب هذا ويشتم هذاك
ويمكن احيانا يتهور ويسرع ويسوي حادث ويضر بنفسه ويضر باهله معاه
لذلك انسب حل بعد الحلول اللي كتبتيها يسمحون لنا بالقياده وخلصنا :d

[هلا]

هلا والله بنويقه الحلوه ،،

أنا والله معكم قلباً وقالباً

وأقول ما يحر البني آدم إلا دريهيماته ،،

بمعنى لو انهم يشددون في المخالفات والعقوبات ،، بنشوف نتايج ان شاء الله


وعلى طاري السواقه والطرقات ،، هاليومين فيه مشروع اسمه سالك عند اخواننا الإماراتيين في مدينة دبي بس ،،

هذا المشروع معمول فيه في لندن وإن كان مختلف بطريقة الدفع

ياليته يطبقونه عندنا عشان الناس ما تطلع تطمش بالشوارع من غير هدف يصير اللي بيطلع يكون له غرض ،، وإلا لا يطلع ،،

مير أمي تقول ليتهم يحطون رسوم مثل دبي في طريق الملك عبدالله في كل إشاره ويغلون الرسوم عشر ريال عشان ،، أبشركم أمي افترت ،، الحمد لله ماهي وزيرة مواصلات ،، ولا كان محد طلع من بيته :)(

عاد أنا اقول وطريق الملك فعد وشارع العليا العام ،، والتحلية هذا يصكونه خير شر ويخلونه مشاه ،، لأنه كذا وإلا كذا واقف..

ويعطيك العافية إختي ناقه ،،

والله يا ~m!ss*f@llen~ أنا مش شايفه كبرياء أنا شايفه عليميه في السواقه وشايفه عناد وشايفه مناطح ،، محد يبغى أحد يعدي قدامه ،، تقل قاتله قتيل لو خلاه يعدي

أنا اللي أعرفه ان السواقه فن وذوق وأخلاق وتعامل ،، على العموم كل واحد يسوق حسب تربيته وأخلاق ،، والسواقه عندنا بينت معادن ذا العالم..


Doodat Algz ،،

نومي وحلمي أقول ،، السواقه ذي لانتي شايفتها لا إنتي ولا بنتك ولا حفيدتك ولا حفيدة حفيدتك

تبين تعرفين وش المستحيلات الثلاثة ،،

ترا ماهي الغول والعنقاء والخل الوفي ،، لا هي


1 - ان الحرمه تسوق عندنا.
2 - ان بزاريننا يلعبون في الفود كورت بأدبهم ومن غير صجه.
3 - اننا نكون متواضعين وما عندنا حب المظاهر والفشخره.

هذا والله اللي المستحيلات الثلاث برايي :)(

وزين سويتي يومك سفهتي راعية المالك ومالو خخخخخخخخخخخخخخخخخخخ

[Doodat Algz]

^

ان شالله انها مهب مستحيله الا قريييبه جدا مدام حنا بعهد ابومتعب وهو واعدنا بهالشي
ومدري ليه مكبرين السالفه ومسوينها مستحيله ومدري ايش
بلعكس لو فيه احد يتكلم ويطالب ويسوي شي نقدر نحصل اللي نبيه
ونقدر نسوق ان شالله اذا ان حنا الحمدلله مقتنعين بانها شي لاحرمه القران ولا السنه
ولاهوب ذنب عشان يسوون كل هالزحمه عليها
وانا كمواطنه اعتبر قيادة السياره حق من حقوقي اللي لايمكن اتنازل عليها وراح اطالب فيها باللي اقدر عليه سواء بالنت ولا غيره اهم شي حنا نسوي اللي علينا وكل شي بيد الله ولكل مجتهد نصيب ان شالله

[سبسيال]

مرحبااااااا
جد حركات تقهر عدل
يعني مايعرف هالأب ان هالشي خطر له ولعياله
كله كوم وكوم الولد مطلع راسه ياليته قاعد قدام علشان يمكن يقدر يمسكه
لا قاعد ورى والأخ داعس ولاعنده

الله يهديهم ..

[وتلومني فيك؟]

بصراحه كلنا 00نتمنى اننا نسوق 00وصح السواقه ماهي حرام ولا عيب00وهي حق من حقوقنا,لاكن فكري ؟؟؟طيب واذا سقنا وش راح يصير؟؟؟ بيتغير حالنا للاحسن 00واذا طفشت طلعت المكان الي ابيه000ولا احد يكلمني؟؟ واحسن من اني اقول لابوي ولا لاخوي انه يوديني000ويالله عاد يبدى يتعذر0000كله علشان مايطلعني000من حقه يبي يتونس00واحنا لو سقنا راح ننبسط000وااااو اخذ صديقاتي واطلع00ولا00؟؟؟طيب مافكرتي ايش الاشياء الي خلتهم يمنعون000ومايوافقون؟؟؟انتي فكرتي بجانب000بس مافكرتي بالجانب الثاني وهو السيئ؟؟؟وش تتوقعون الاضرار الي راح تصير000اذا سقنا ؟؟؟؟؟
مشكوريييييين على الموضوع الحلو000لاكن حتى لو تكلمنا ماراح يصير شي؟؟
;) لاتحسبون اني معارضه 000بالعكس000اتمنى هذا يصير00بس انتو جاوبوني؟؟؟؟
تحياتي:)

[sero]

اول شي يسلمو على الموضوع ,,

بصراحة الاستهتار بقضية الامن والامان على الطرق شائع جدا للاسف في وطنا العربي ,, وتقريبا ينعدم في الدول المتقدمة والمتحررة مثل دول اوروبا وامريكا وحتى بدولة الشؤم اسرائيل ,,,
شوفي بالنسبة عندنا هالاستهتار مو موجود في المدن الكبيرة او المدن اليهودية بينما بتشوفيه شائع بمدينتي مثلا ولكن احيانا هناك نوع من التحفظ بالنسبة للسياقة ,,,

لو على قضية الولد الي بيجلس بالمقعد الامامي فعندنا القانون يعاقب كل شخص يركب طفل دون الثامنة من عمره في المقعد الامامي بالسيارة وطبعا المخالفة بتكون دفع نقود باموال طائلة واحيانا تؤدي الى سحب شهادة السياقة من السائق او السائقة واحيانا السجن والمحاكمة ,,,

وفي كمان مخالفلات بالنسبة للتكلم بالجوال او عدم ربط احزمة الامان وهكذا وجميعها مخالفات هائلة وطائلة الاموال قد تصل الي 500 شيكل او ريال تقريبا ,,,
وطبعا غير القوانين بالنسبة للسائقين الجدد فيمنع من اركاب معه بالسيارة اكثر من اثنين لمدة سنتين من اخذه شهادة السياقة ,,,


قد تكون قوانين السير صارمة نوعا ما لكنها جميعها اتت فقط من اجل المحافظة على امن وامان الشارع ...


ممم اعطيت فكرة عن المنطقة الي عايشة فيها ...
ويسلمووو على الموضوع مرة تانية ...

[Doodat Algz]

بصراحه كلنا 00نتمنى اننا نسوق 00وصح السواقه ماهي حرام ولا عيب00وهي حق من حقوقنا,لاكن فكري ؟؟؟طيب واذا سقنا وش راح يصير؟؟؟ بيتغير حالنا للاحسن 00واذا طفشت طلعت المكان الي ابيه000ولا احد يكلمني؟؟ واحسن من اني اقول لابوي ولا لاخوي انه يوديني000ويالله عاد يبدى يتعذر0000كله علشان مايطلعني000من حقه يبي يتونس00واحنا لو سقنا راح ننبسط000وااااو اخذ صديقاتي واطلع00ولا00؟؟؟طيب مافكرتي ايش الاشياء الي خلتهم يمنعون000ومايوافقون؟؟؟انتي فكرتي بجانب000بس مافكرتي بالجانب الثاني وهو السيئ؟؟؟وش تتوقعون الاضرار الي راح تصير000اذا سقنا ؟؟؟؟؟
مشكوريييييين على الموضوع الحلو000لاكن حتى لو تكلمنا ماراح يصير شي؟؟
لاتحسبون اني معارضه 000بالعكس000اتمنى هذا يصير00بس انتو جاوبوني؟؟؟؟
تحياتي

اذا كنتي تكلميني فانا راح اجوب على سؤالك اللي حطيتيه مع اني انا مادافع عن شي
الا مقتنعه فيه اقتناعا كليا
يالله لنفرض انه فيه سلبيات لقيادتنا للسياره
بتقولون البنت ماتعرف تسوق ومدري ايش وتخاف ..
طيب البنت طبيعي ماراح تسوق الا وهي داخله معهد تعليم القياده وماخذه شهاده ورخصه < يعني راحت عليكم هالنقطه
بتقولون البنت ممكن تبنشر ولاتتعطل سيارتها ومن هالكلام..
طيب وش فيها تقدر تكلم ابوها وتقوله اللي صار وهو اكييد بيجي يساعدهاا واذا لاقدر الله ماساعدها
احد من اهلها تقدر تخلي اي واحد يساعدهاا وانتهينا وهذي برضوو راحت عليكم
زيين بتقولون البنت لازم ترمي الحجااب وتتكشف اذا ساقت < مع اني مدري شدخل الحجاب بالسواقه
بقولكم الحجاب مسأله شخصيه اوكي يعني لا انا ولا انتي نقدر نتدخل في اي وحده ماتلبس الحجاب لانها اكيد ماسوت هالشي الا مقتنعه فيه مع اني ماتووقع ان القياده تكون سبب في نزع الحجاب لان المسأله مسألة ضعف الايماان او قوته بالشخص نفسه ( الحجاب اللي اتكلم عنه هو الحجاب اللي فرضه القران تغطية البدن والراس بغض النظر عن المنقبات والمغطيات )
قبل ما اختم كلامي فييه نقطه لازم الكل ينتبه عليها
القيااده لو سمحوو فيهاا ماراح تكون مفرووضه على الجميع ( ولكن راح تكون للي محتاجها فقط )
ولماا يمنعوهاا فاكيد بيكون الضرر على اللي محتااجها بينما اللي مو محتاجها ماراح يضره شي واكيد هالشي يعتبر اناانيه
وبالنهاايه القياده راح يسمحو فيها عاجلا ام اجلا ;) وخل المغتااضين يزيد غيضهم هع

[عسوله]

يا هلا فيك ناقه واحنا مشتاقينلك اكثر

منوره وربي انت وبنت نت بتواجدكم معنا


السواااااااااااقه

صراحه احس البزارين الي في الملاهي يسوقون احسن من سواقة بعض شباااابنا في الشوارع

وربي شي مو طبيعي تكوني واقفه في امان الله في السياره ما تشوفي غير واحد جاييك وقاطع عليك وماشي قدامك

يا اخي اصبر طيب شوي الدنيا مب طايره

ولا الاهل واستهتارهم
والي يسمحون للبزران انهم يسوقون

يعني دااايما نسمع انه الولد شلح مفتاح ابوه واخذله كم لفه(يوم يكون الولد صغير يعني)
اما انه الاهل يعطوهم ويشجعوهم على السواقه في اعمار صغيييره هنا المصيبه العظمى

يختي مره كنت اكلم خالتي (في جده)
وتقولي ياللله ياعسولللللله
انا تخرعت صراحه قلتلها ايش فييييه ،قامت قالتلي لو تشوفي قدامنا ولد عمره مايجي 12 سنه ان كثر 10 سنين وسايق سياره جيب لاندكروفر ورايح البقاله،ويعني واااضح جدا انه اهله الي راسلينه مشتري لبن وخبز

الناس ما قامت تخاف من شي !!
ولا حتى على عيالها



مشكلة بلدنا اننا اكثر بلد تطلع قوانين لكن للاسف ما تطبق
مثل قانون المخالفه على التحدث بالجوال ليتهم طبقوها كان خفت الحوادث شوي

والحمدلله انهم طبقو قانون السجن في المخالفه بالسرعه

طوولت عليك بالحكي

واشكرك عالموضوع..

[وتلومني فيك؟]

:hi: انا قلت لا تحسبوني معارضه؟؟؟ ابدا اصلا انا كل مايفتحون هذا الموضوع ويبدون الرجال :confused: يعطون رايهم000:)( وكلهم معارضين؟؟ابدا انقهرررر ونفسي امسك كل واحد واعطيه "كفين" هههههههه :beated: واساله لييييييييييييه؟؟ وانا بعدين ماقصدت احد000؟؟ولا00انا بس اعطي راي واحد من بين ارااء؟؟وكل واحد له رايه؟؟ومو عيب اذا قلت رائيي000
طيب لو تكلمنا عن هذا؟؟؟ايش راح يفيد؟؟؟؟؟الملف خلاااااص انقفل0000؟؟:mad: وما عاد شي يهم؟؟000000000للاسف000000:cry:

[دلوعةأبوها]

الدول العربية بشكل عام النظام معدوم فيها لكن هنا في السعودية عندنا امكانيات كبيرة زي وضع الكميرات في الشوارع ودفع الغرامات وكل مازاد عدد المخالفات زادت قيمة المخالفة وكمان مايعطوا الرخص لأقل من عشرين سنه

لكن أحس أنهم مايطبقوا الا بعض هذي الأشياء وماناخذ من الغرب الا ....................

وبخصوص الأخت الى قالت إن حل المشكلة يكون بسياقة المرأة للسيارة أقولها بلعس حتزيد المشاكل أكثر
وحتحصل بلاوي إحنا في غينا عنها الله وحدة الى عالم بيها

[Doodat Algz]

وبخصوص الأخت الى قالت إن حل المشكلة يكون بسياقة المرأة للسيارة أقولها بلعس حتزيد المشاكل أكثر
وحتحصل بلاوي إحنا في غينا عنها الله وحدة الى عالم بيها

ماحب الردود المبهمه انا
ممكن توضحين لي وشهي المشاكل اللي بتحصل بسياقة المرأة للسيارة
بكل وضوح وانصاف عشان اقدر اتناقش معاك على كل نقطه
وباختصار شديد عشان مانقلب النقاش لموضوع ثاني

استناك

[faith]

ايييييييييه ياقلبي لا تتعب بس >> طالعه من قلب

انا من يوم جيت السعوديه صرت اخاف اطلع الشارع ويوم اطلع اتشهد طول الوقت ارجع البيت كامله مو بالقطاعي ... دي الشوارع خربانه والناس دايخه اش نبغا نصلح تنصلح وين مانطقها عويا وعاملين زي القربه قد مانعبيها تخر >>> ياعمري على التشبيهات بس
متى ما صارت القوانين صارمه وراحت الواسطات راح تتصلح البلد
موقف حصل ....
واحد قاطع اشاره مسكوه الشرطه عشان المخالفه قالوله عندك حل من 3 >> حشى من سيربح المليون
اما انك تدفع 900 وتطلع في نفس اليوم >> قيمه الغرامه
او انك تدفع 700 وتطلع اليوم التاني
او انك تدفع 500 وتطلع بعد 3 ايام
******** احلى اسعار عروض خاصه بمناسبه الصيف

اما عن سواقه المرأه وان راح تصير فيها مشاكل اكثر اثبتت الدراسات اللي عملوها في امريكا والاحصائيه هناك عن معدل عدد الحوادث وطريقه السواقه لقو ان عدد الحوادث عند الرجال اكثر من النساء وكذلك لقو ان المرأه ابرع من الرجل في السواقه وفي النجاح في تعلم القياده اكثر من الرجل في مدارس تعليم السواقه وهم الاكثر في اتباع قواعد المرور اكثر من الرجال >>> يازيننا حنا الحريم >>> مدري اذا ينطبق على حريمنا هنا والا لااااع ؟؟؟

مشكوره نويقه على الموضوع

[جالكسي @]

اية والله أختي ناقة كلامك عين الصواب:yes: كفيتي ووفيتي ماخليتي لي شي أقولة
يعطيك العافية و تقبلي مرور أخوك : جالكسي @

[دلوعةأبوها]

ماحب الردود المبهمه انا
ممكن توضحين لي وشهي المشاكل اللي بتحصل بسياقة المرأة للسيارة
بكل وضوح وانصاف عشان اقدر اتناقش معاك على كل نقطه
وباختصار شديد عشان مانقلب النقاش لموضوع ثاني


استناك





آهلين أخت Doodat Algz


شوفي أنا حرخصها في نقاط


1 – المعاكسات حتزيد وإحنا مو خلصانين مع أبونا وأخونا منها اشحال لو كنا لوحدنا
2 – حتكثر الحوادث والمخالفات والزحمه وإحنا مو ناقصين والله يعين رجال المرور
3 – إن الوحدة تأخذ راحتها في الخروج من المنزل مدام عندها سيارة من غير لا حسيب ولا رقيب حتي لو قلتي تستأذن أهلها مو كل الناس زي بعض
4 – الخطف والاغتصاب حيكثر يعني لو واحدة تعطلة سيارتها في مكان نائيي ايش تسوي وأنتي لو تقري جرايد كان تعرفي ايش اقصد الرجال ما سلموا ايشحال الحريم الله يستر علينا
5 - حيتكل بعض الرجال على المرأة في قضاء بعض شؤن البيت مثلن الذهاب والإياب للأبناء من المدرسة شراء مستلزمات المنزل وأشياء أخرى

هذا الى عندي ذحين

[DIΣƬMΛЯ]

مشكوره اختي على الموضوع
كل كلامك صحيح بالذات في الرياض الوحد صار يخاف على
نفسه من الغشمان لأنه خذا الرخصه وهو جالس بالبيت
ومايعرف اساسيات السلامه وامان الطرق.
اما من ناحيه الاطفال قد يكون الشخص يبي يسوي منظر
ويقول للناس شوفوا ولدي :conf:

متى يعقلون
يعقلون اذا جاتهم مصيبه كبيره وفقد ولده ولا صار
حادث واذاى نفسه والناس اللي في الشارع
السرعه
السرعه مالها حل والدائري يفتح النفس;) واللي يقدر
يقاومه محظوظ .

الشئ الهام الاخر هو حزام الامان لو كل سائق ربط حزام الامان
بدون ظغوط مثل ليس اذا شاف نقطه تفتيش بداء يربطه!!!!!:(
بختصار بعض الناس ماتفهم ولا تفكر :p

[Doodat Algz]

دلوعةأبوها

ياحبيبتي طبيعي اول مايسمحون بالقياده راح تصير بلاوي بس مع مرور الوقت
رح يتعودون الناس عالوضع ويصير عندهم عادي حتى يمكن تتغير نظرتهم للسواقه
ويخلون خواتهم ولا اهلهم يسوقون
واكيد هالشي ماراح يصير بيوم وليله يبيله تعود
والتعود يجي مع تكرار المشاهده
هذا اللي عندي ومابي اطولها وهي قصيره
اقتنعتي ما اقتنعتي شي راجعلك
بس اللي بقوله ان هذا اخر رد لي في ذا الموضوع
لانه بيتحول لمنحى ثاني اذا ظليت ارد على كل شخص
سلام

[Lady In Red]

آهلين أخت Doodat Algz



شوفي أنا حرخصها في نقاط


1 – المعاكسات حتزيد وإحنا مو خلصانين مع أبونا وأخونا منها اشحال لو كنا لوحدنا

2 – حتكثر الحوادث والمخالفات والزحمه وإحنا مو ناقصين والله يعين رجال المرور
3 – إن الوحدة تأخذ راحتها في الخروج من المنزل مدام عندها سيارة من غير لا حسيب ولا رقيب حتي لو قلتي تستأذن أهلها مو كل الناس زي بعض
4 – الخطف والاغتصاب حيكثر يعني لو واحدة تعطلة سيارتها في مكان نائيي ايش تسوي وأنتي لو تقري جرايد كان تعرفي ايش اقصد الرجال ما سلموا ايشحال الحريم الله يستر علينا
5 - حيتكل بعض الرجال على المرأة في قضاء بعض شؤن البيت مثلن الذهاب والإياب للأبناء من المدرسة شراء مستلزمات المنزل وأشياء أخرى

هذا الى عندي ذحين











حبيت أعلّق على اللي كاتبتيه حبوبة ..

احنا عندنا مسموحة السواقة للبنات وانا اول وحدة اسوق وبصراحة مو شايفة أي غلط فيها أو انها مسبب لأي ظاهرة من اللي حكيتي عنهن .. :(
انت قلتيها بنفسك المعاكسات بكل مكان ،، واحنا سايقين أو واحنا حدا سايق فينا :conf:

خطف واغتصاب ؟؟ :o

يووووو هي الوحدة تاخد رخصة عشان تقضي حاجتها ويلا عشان تقطع صحاري وبحار " ومناطق نائية " ؟؟ :conf:

وبالنسبة لأنو تطلع الوحدة بدون حسيب أو رقيب.. هاد عاد أمر يرجع لأهلها وإإلها طبعاً .. ومو الدولة والوزارات الحكومية والغير حكومية مسؤولة عنو :mad:

تقبلي تحياتي ;)

[دلوعةأبوها]

انشاء الله ان السواقة ما تدخل السعودية لا بعز عزيز وذل ذليل

واجلسي انتي وخويتك احلمو على راحتكم :p

احلام سعيد حبوبه :sleep:

[عشقي عيونك]

عــليكم الصــلآآم...يااخيه....

يااهلاا وغلاا فيــك يالغــآآليه....

وبصـــراحه قلتــي موضوع من اول حــآآرق رزي...:mad: حتى قبل كم يوم كنت اتكلم عنــه...الحـــين اللي يحطلــك البزر فحظنــه ودي اعــرف مايستفــآآد من ذي الحــركه..

يعنيـــي مثلآ يســآآعده الطفل يدق عنه بوري..ولا شلـــون..بصراحــه اشوفهــآ في قمــه التخلف..زي مااقلتي,,المفروض الاطفــآآل يحطــون لهم.,,كراســي تنــآآسب سنهــم..

ويكــون فيهــأأ احزمه للامــآآن..يعنــي مثل دول اوروبــأأ بصــرأأحه..من جئتتد تحسينهم يخــآآفون ع حيــآآه الانســآآن..برتني سبيرز لمـتا حطت ولدهــاا بحظنهاا قومو الدنيا وقعدوهــا حتى جو يااخــذون ولدهاا منهاا عشــآآن حطته بحظنهاا اثنــآآء ماااتسوق..<والله انهم نشاما...خخخ

والله منظـــر انـا شفته بــأم عينــي...وانـآ مع اخــوي نتمشى بالســيأأره لقيت سيــاره ددسن..ابو غمــاره ومعه حرمته...وحــآآطين ولدهــم بالصندوق..والادهى والامــر الام مــاده يدههــا ورى عشــآآن خايــفه ع ولدهــأا لا يطيــح.,,تيب ريحي عمرك وقعدي عندك قــــدآآم ع بـآآلهم الحـــين يفسحــونه
وربي عصــبت من ذ1 الموقف...:mad:

والمفــروض الشيباان اللي يوصل عمـــره 60 سنه خلااص يسحبون الرخصه منه,,,لاناغلبهم يسوون مشااكل بالخط وماايشوفوون...

وبصــرااحه اغلب الشعب السعــودي ماايطبق القوانين..والبى كل ذي القوانيين من مصلحتهم بس مدري شلون التفكــير,,,

سووري اختي وشكلي تفرعت فالموضووع.

ويعطيك العافيه ع الموضوع

[Doodat Algz]

--------------------------------------------------------------------------------

انشاء الله ان السواقة ما تدخل السعودية لا بعز عزيز وذل ذليل


اها هذا اللي قدرتي عليه ؟
عسى ماتكلفتي بس

["صــوت العنــا"]

أهليــــــــن وضحى ..

إإمممممممممم ..

والله لوووو نتكلم من اليوم إلـى القيـامه ..

حنا مشكلتنــا من يسمــع .. من ينفــذ .. من يوصـل نـداء الشعـب ..

صناديق الإقتراحات الي في كـل محل أجزم إن نصف محتوياتهــا في سلة المهمــلات ..

مشكلة القطــاع الحكومي محد بيسوي أكثر من واجبــه ..

والله المستعــــــــــــااان ..

إإي صح .. نظــام بلدنا .. مالك ومـــالو : P

[ناقه]

Doodat Algz هلا والله وغلا ...

والله إنك صدقتي ياشيخة ... بس متى متى متى ؟ راحت أعمارنا واحنا نستنى قسم بالله ...
أشوى اللي اخترعوا عمليات الليزك عشان لين سمحوا بالسواقة وصار الشوف شجر يمدينا ننجز عيوننا ونسوق مثل باقي خلق الله في كل بلدان العالم ...

يعني يا ناس معقول الكرة الأرضية كلها غلط واحنا اللي صح ؟

وكل ما قلنا شي قالوا نخاف على بناتنا بيغتصبون بيجرجرون و .. و... و ...

مو الحل ان احنا ننحبس ونتعطل عشان فيه ناس مريضة نفسياً في الشارع ..

الحل انهم هم يندقمون بتكثيف الأمن والشرطة .. واحنا اللي احنا الناس الطبيعية نستمتع بحياتنا ونعيييييييش ...

المشكلة اللي يسمع يقول صواريخ كل وحدة تطيح الطير من السما ...


لا حول ولا قوة إلا بالله بس هذا اللي أقدر أقوله ...

مشكورة على ردودك العاقلة والمنطقية .....

[ناقه]

هلا والله وغلا بنت نت ...

أقول يا شيخة سلميلي على الوالدة بس ... هذه الناس الخبرة ...

عز الله انهم عند الدراهم يضيعون ...

بس الله يسعدك تفائلي خيراً يا أخية وأقبلي على الحياة لكن إن شفتي شين تكرهينه ترى منب مسئولة ...

منتب عاقلة حاطو ثلاث مستحيلات جديدة ...

تحتكين بالعجايب السبع يوم جددوها (؛

مشكورة على الرد يا بنت نت .. لاخلا ولا عدم إن شاء الله

[ناقه]

سبسيال هلا والله وغلا ...

إلا والله أكيد إنه يدري بالأخطار بس مِتْجيود سواقته وشايف نفسه شوماخر ...

هذه هي المصيبة الحقيقية ... من جد

يسلمو على الرد ..

[ناقه]

وتلومني فيك؟ هلا والله ..

ما عقب الأضرار اللي حنا فيها الحين من السواويق والبلاوي اللي تحصل منهم واللي واااااصلة حد الوضع الحرج ...

وكل شي لما ينحط بنظام وأصول تلاقين فايدته عمت ..

أما شغل الحواق والبربسة مثل السواقة اللي قاعدين نشوفها بالشارع ... ما يوكل عيش ..

يعطيك العافية ومشكورة على مرورك الكريم ..


sero هلا والله ومرحبا ...

والله إنها قرارات صح ... ومن خاف سلم ...
استمتع فيها لان غيرك محروم منها ...


وطبعا غير القوانين بالنسبة للسائقين الجدد فيمنع من اركاب معه بالسيارة اكثر من اثنين لمدة سنتين من اخذه شهادة السياقة ,,,


شي جديد ... بس والله حلو ..

ألف شكر على ردك و معلوماتك المفيدة ..

[ناقه]

هلا والله وغلا بعسوله ..

ايه واللــــــــــــــه ! كله كوم وهالمراهقين لين لقطوا السيارات وساقطوا على خلق الله بالشوارع ...

أصلاً هذا خطر حتى لو ساق بالحارة لأنه ممكن يدعس له أي أحد طالع من المسجد وإلا يمشي بالشارع ...
ما عنده خبره ولا فيه سرعة بديهة ..

تدرين يا عسولة إن مرة سمعنا صوت زلزال بحارتنا بعدها سمعنا خبطة شنيعة ...

طبعاً طلعوا كل اللي بالحي يشوفون وش السالفة .. واحنا من ضمنهم

صار يالشيخة ولد عمره ما يتعطى 13 سنة لاقط السيارة بالعصرية وأبوه مقيل وطالع يفحط فيها وتسلط يفحط عند بيتنا ..

الزلزال كان هو التفحيط .. لكن تدرين وش الخبطة الشنيعة ؟
إنه خش في سور بيتنا الله لا يعمينا !!!

بركة من رب العالمين إن الجو كان فطسة ومحد كان يمشي بالشارع ..

طبعاً كلموا أبوه طلع بيته بآخر الحي ... و انقص وجه الأبو وبغى ينحر ولده في الشارع ..

ايه والله صدقتي في قانون السجن ... والله إنه أحسن شي سووه ...

يعطيك العافية عسولة ومشكورة على الرد ..

[ناقه]

دلوعة أبوها هلا والله ...

والله صدقتي الإمكانيات كثيرة ...
والقوانين أكثر ... لكن وين البركة ؟

والمشاكل فينا فينا .. على الأقل نجرب نوع جديد منها ..

مشكورة على الرد ...

faith هلا ومرحبا ...

لا حول ولا قوة إلا بالله ... والله ما تنلامين تتشهدين قبل لا تطلعين .. تقول الإحصائيات إن عدد المتوفين سنوياً من الحوادث في السعودية يعادل نسبة المتوفين على جبهة حربية ..

تخيلي ؟ وعشان إيش ؟ الإهمال وقل الدبرة ...

وسالفة إحصائيات أمريكا ... أبشرك شكل قريبتي داخلة في الإحصائية ..

راحت هي واهلها لأمريكا وقعدوا فيها فترة فدخلت هي واخوها لمدرسة سواقة علشان هي تتعلم وهو يطلع رخصة ...على باله بس بيعملون له اختبار وبتطلع ...

هي نجحت بعد ما تعلمت وطلعوا لها رخصة ... وهو رسب وقالوا تدرس من جديد .. وإلا ما فيه رخصة ...

ليش هي نجحت وهو لأ مع انه يسوق من أكثر من 7 سنين ...

لأنها متعلمة على نظافة ... ما عندها عقل باطن مثله مخزن تجارب عجيبة عن السواقة والمزورق بين السيارات ..

طبعا انواع الشماتة فيه ..(؛ سوالف بنات عاد لازم

يعطيك العافية ومشكورة على الرد ..

[ناقه]

هلا والله جالكسي .. يسلمووو على المرور والرد ..

غلطان بالموقع هلا والله وغلا ...

إيه والله الواسطةذبحتنا على قول faith ..
تجي الرخصة وإنت ما بعدت طلبتها حتى ...
المشكلة يتوسطون في أشياء تضيع ...
يعني ياخذ ذنبه وذنب كل خلق الله اللي بيأذيهم ...
يعني مالقيت تخدمه إلا في ذا الموضوع ... ضاقت يعني ؟؟

ياخي الناس يبزون بعيالهم لين طلعوا عباقرة ..
أوادم على الاقل بلاش عباقرة
حنا نبز بعيالنا لين غنوا يا طبطب وإلا الاماكن ...
يعني تعاسة الوضع ...

مشكووووور على الرد الحلو ويعطيك العافية

[ناقه]

Lady In Red هلا والله وغلا
يووووو هي الوحدة تاخد رخصة عشان تقضي حاجتها ويلا عشان تقطع صحاري وبحار " ومناطق نائية " ؟؟

بالضبط !!! صح لسانك والله ...

يعطيك العافية ومشكورة على الرد ..

عشقي عيونك هلا والله وغلا ...

سلامة رزك من الحرق ... بس والله ما الومك ...

اما الشياب عز الله انك تخافين عليهم من انفسهم قبل الناس ...
عاد انا الموضوع جاي على الوتر ... لان سواقنا شويب ... آآآآه لو احكيلك ...
لا وتوه ماخذ الرخصة من سنتين او اقل ... كان طول عمره حارس لكن حدنا الله بسبب الفيز وخليناه يتعلم السواقة ... بس الله لا يوريك ...
ما يبقى دعاء خروج ما اقوله قبل لا اطلع معاه ...
خليها على الله بس ...

يا شيخة هناك ماعليهم منك ولدك والا مو ولدك ... اهم شي هل انت كفو تربي عيال والا لا .. لانك اذا منت كفو فيه غيرك كفو ومتشفقين العيال ...

ما فيه لعب ولا فيه حواق ... كل شي بنظام ..

*قايـد الريــم* هلا والله وغلا ..
ادري والله محد يسمع ...
لكن لعل وعسى ...أقلها نفضفض لا ننبط من المر ...
و صناديق الاقتراحات ... تلقاها مليانة اغلفة علوك ...
اييييه بس ... الله المستعان على ما قلت .
مشكور على الرد ويعطيك العافية ...

[بنت نجد]

مرحبا اختي ناقه


نورتي المنتدى برجعتك


وموضوعك قلب علينا المواجع

انتي شفتي طفل بحضن ابوه وطبعا هذا يدل على عدم الاحساس بالمسؤوليه فما بالك بأطفال يقودون المركبات لوحدهم ؟؟

الأطفال او صغار السن خلف المقود بكل بساطة يقودون المركبة بدون حسيب ولا رقيب


واعتقد السبب الرئيسي لقيادة الأطفال للسيارة هي عدم وجود رجل مؤهل للقياده لدى تلك الأسر أحيانا بالاضافة الى اهمال بعض الأباء وأولياء الأمور وتنصلهم من المسؤولية والتسكع بالاستراحات وترك مسؤوليه البيت والأولاد على الزوجه أو الأم التي بدورها تعتمد على طفل احيانا لايتجاوز 12 سنه ليقود سيارة لينجز بعض المهام التي اوكلوها اليه والنتيجه تعرفونها احصائيات مهوولة للحوادث خاصة في المدن الكبيرة


اعتقد لو يرتفع العمر الافتراضي للحصول على رخصة قيادة الى 22سنه سواء للشاب او البنات ( بافتراض لو سمح لهن بالقيادة )تنحل امور كثيرة

منها : ان مرحلة المراهقة تقريبا انتهت

في هذه المرحلة اغلب الشباب انهوا دراستهم الجامعية

اعتقد مشاكل كثيرة بتنحل

كذلك قيادة المراة للسيارة سوف يحل مشكلة الاعتماد على الرجل اللذي احيانا لايكون حاضرا او متواجدا في البيت حقيقة او مجازا


انا من المؤييدين لقيادة المراة للسيارة لكن على المرأة ان تطلب ذلك بنفسها وأن لاتجعل الجنس الآخر هو من يبحث لها عن حلول لها


اين المرأة التي تعبر عن نفسها وحاجتها

عذرا للأطالة

تحياتي للجميع

[شرشبيل000غير]

:) :) :) :)

[M!ss.lana]

والله ماجبتي جديد ياناقه
يعني عندنا بالخليج عموما عدم اهتمام لا بالارواح الانسانيه<<احس الجمله غلط
ولا بالبيئه
يعني مافيه اي احترام للقوانين والمشكله بالموضوع ان هالاحترام راجع بالفائده لهم
يعني اللي يحط ولده ورى ويحزمه بالمقعد يكون سوا خير لنفسه ولأسرته وطلع قدوه للناس غيره
يعني من يطالع عسكري يروح يربط الحزام والله مسخره
انا ما اتمنى الا يحطون مخالفات توصل للــ 1000 وووواكثر عشان ينقرصون زين ويتأدبون
كله كووم والبيئه كوم
انا مابط جبدي الا البيئه
مدري ليه مايكون فيه تعاون
يعني ادخل مكان القاه وسخ وانتو بكرامه اروح اوسخه ليه ؟؟ واي ؟؟
يعني ماراح يضر المكان وسخ بالاساس
حاقه تعل وتنرفز

يعني مع احترامي لي ولكم احنا دول مسلمه ونعرف ان النظافه من الايمان
والكفره الفجره امريكا وغيرنا انظف منا
طبعا احنا انظف منهم بامور واجد
عموما كل بلد فيه صالح وطالح وانا والله مو قصدي اسب بس محتره من اللي اشوفه
ادري طلعت من الموضوع بس حلات المواضيع لما تتشعب وتكون كم نقطه بموضوع

يالله ننتظر جديدكم
تحياتي
لانا

[دلوعةأبوها]

يووووو هي الوحدة تاخد رخصة عشان تقضي حاجتها ويلا عشان تقطع صحاري وبحار " ومناطق نائية " ؟؟


بالضبط !!! صح لسانك والله ...



ماشاء الله عليك ياخت ناقة ايدتي كلامها من غير ما تفكري دقيقه واحده يعني مثلاً بين الرياض والطائف ما فيه صحاريييييييييييييي وقفااااااااااااااااااار والا المنطقة ماهوله بالسكان وأنا ما ادري والا يمكن يعطوا رخصه للحريم بس في حدود مدنتهم وبين المدن ممنوعين لو سووها حنصير نكته في حلق الى يسوى والى ما يسوى وحطي في بالك لو لاقدر الله سيارتها تعطلت بين المدن وهذي تحصل ايش تسوي لا تقولي ان فيه أهل خير وشهامه ونخوه لو فيه واحد الباقين ما فيهم والدليل الى نشوفه هذي الأيام أبوي الله يحفظه يقول قبل عشرين سنة أو أكثر كانت الأسواق في الحرمين وباقي المدن يقفلوا المحلات بالقماش بس وما تنسرق ولا شي وذحين يقفلوا المحلات بأربعة إقفال وكل قفل أكبر من أخوة ومع كذا تنسرق في وضح النهار وتكون بعضها على شوارع رائسيه

انتظر ردك ويالتي تفكري شوي قبل ما تردي ولا تنسي إن هذا موضوعك وأحنى ضيوف عندك يعني ما توقفي في صف أحد ضد أحد عشان مايدتو