شواطئ الذكريات (الذكرى الاولى )

[همس الزهور]

هذه قصة حلو وممتعة وعلى شكل اجزاء اذا حبيوتها وتبغون تكملتها كملتها لكم على عيني وراسي
وانا جاهزة اي نوع من القصص تفضلونها علموني اكتبها لك عالعموم ماطول عليكم هذه هي القصة
( شواطئ الذكريات )

: الذكرى الاولى :+:...................
...... الشخصيات ...
نهى : عمرها 15 سنة...
غادة : 12 سنة ...
جنا : 3سنين...
:. يعني العائلة كلها 3 بنات + الام (نورة) + ام محمد ( ام نورة يعني جدتهم ) ...
طيب كلكم بتسالوني وين راح ابوهم ؟؟؟
ابوهم متوفي قبل ما تنولد جنا بـــ شهرين يعني جنا ما تعرف ابوها ولا قد شافته ...
المهم نبدا ...
نورة (ام نهى) ... كانت جالسة في الصالة وفجأة سمعت صوت شي يطيح في الارض والصوت كان طالع من غرفة جنا او ( جوجو ) مثل ما يدلعونها ...
"خلونا في المهم " ...
راحت نورة لغرفة جنا ولقتها طايحة من السرير فراحت شالتها وقعدت تسمي عليها ورجعتها في سريرها وقعد تتتامل فيها ودمعت عينها تذكرت اليوم اللي اخوها منصور وصل لها خبر وفاة زوجها ابو نهى ...
كانت يومها في بيت اهلها لان كان بكرا يوم العيد ...
منصور : نورة ... نورة ...
طلعت نورة من المطبخ ...
نورة : سّم ...
منصور: سّم الله عدوك بغيت اكلمك تعالي للصالة ...
نورة : انشالله ...
:+: في الصالة :+:
منصور : نورة انتي مؤمنة بالله وان كل شي مقدر ومكتوب ......
نورة والخوف امتلك قلبها : قول ادخل في الموضوع ...
منصور : هدي بالك .... ا
قاطعته نورة : الله يخليك لا تلعب باعصابي
منصور: حنا ما نقدر نعترض على قضاء الله وقدره و...
نورة وقفت وبصراخ : منصور قول ترا ما عاد اتحمل اكثر ...
***لحظة يمكن تقولون هي بالغت في ردة فعلها شوي بس هو اسلوبه من جد يلعب بالاعصاب وينرفز***
منصورمنزل راسه : ابو نهى عطاك عمره ...
نورة من غير تصديق : من جدك انت ...
منصور ساكت ...
نورة هنا ما عرفت وش تسوي ما عرفت وش تسوي تصيح ولا تنهار ولا تضحك ولا تصدق ولا تكذب ... مشاعرها متضاربة جدا ما تدري بالظبط بايش تحس ...
بس ما جا على بالها الا شي واحد آخر مكالمة بينها وبين زوجها العصر ...
:+: المكالمة:+:
نورة : يا ليت كنت معنا نهى وغادة كل شوي يسألوني عنك ...
صالح: بس نهى وغادة متأكدة امهم ما اشتاقت ؟؟؟
نورة تضحك : هههه لو ما اشتاقت كان ما كلمتك ولا ؟؟
صالح : ههههه الا بس ابي اتاكد ...
نورة : لا تاكد وتطمن بعد ...
صالح : لا انا من هالناحية متطمن ...
نورة : طيب ما قلت لك عن الاسامي اللي لقيتها اليوم ..!!!
صالح : لا ما قلتي ...
نورة: جنا و...
صالح قاطعها : الللللللللللللله مرة عجبني الاسم خلاص البنت جنا ...
نورة : ما كملت لك ...
صالح: مالي دخل انا عاجبني الاسم ...
نورة : ههههههه حتى انا تصدق ...
صالح : المهم انتبهي للبنات ما اوصيك عاد ...
نورة : انشالله ...
صالح: يالله مع السلامة وراي طريق للرياض سلمي على النات والاهل ...
نورة : يوصل انشالله ...
:+: انــــــــــتهت المكالمة :+:
نورة انتبهت لمنصور اللي كان يكلمها ...وراحت لغرفتها بكل هدوء بعكـــــــس ما كان منصور متوقع تمـــــــــــاما ..
وكانت نورة صابرة ومحتسبة الاجر وردة فعلها كانت قوية ومرت الايام وولدت نورة وجابت جنا ...
....... ماما .... ماما .....
انتبهت نورة على صوت جنا اللي قامت من النوم ...
نورة : نعم حبيبتي ...
جنا : ماما ابي دانينو...
نورة تضحك : هههه يالله صباح خير اول شي قومي افطري بعدين اعطيك ...
جنا : اوووف ذين (زين )
^:^:^:^:^:^:^:^:^:^:^:^:^:^:
راحت نورة لغرفة غادة ونهى ...
اول شي سكرت المكيف ...
بعدين راحت لغادة : غادة الله قومي ما تبون نطلع نفطر ؟؟؟
غادة لااااااااااااااااااااا حياة لمن تنادي ...
يأست منها نورة وراحت لنهى ...
نورة : نهى نهى يالله ما تبون نطلع بسرعة ...
نهى فزت من سمعت اسم "طلعة" ...
نهى : ايييييييييييييه اكيد بنطلع دقيقة يمه بس ثانية وحدة ...
نورة : طيب اصبري خلي اختك الزينة تقوم اول ...
نهى: ولا يهمك نونو اقووووووم البيت كله ...
نورة: اقول وش نونو استحي انا امك
نهى : هههههههه عادي نوني
نورة : الحمدلله يا ربي قومي بس احسن ...
وطلعت نورة وبدو البنات يتجهزون من قدهم معطلين ولا وراهم شي >>> خخخ غايرة الاخت ...
:^:^:^:^:^:^:^:^:^:
:+:في السيارة:+:
جنا : ماما ثوفي نهى ما تبي تثلح ثعلي (ماما شوفي نهى ما تبي تصلح شعري )...
نورة : نهى صلحي شعرها انا مشغولة مع خالتك ...( بالتلفون طبعا )
نهى : اوووووف ( تكلم جنا ) ترا ازعجتينا ليش توك تتذكرين اننا بنطلع كان قلتي لي في البيت تعالي ...
غادة : ايه والله هالبزر ما عمري شفتها تصلح شعرها في البيت الله لا يبلانا ...
جنا : ماما ثوفيهم اهئئئئئئئئئئئئئئئ وبدت تصيح (ماما شوفيهم ) ...
نورة : تعال ماما جوجو خليهم ذولي اللي ما منهم فايدة ...
جنا : ماما لدعيهم للبيت ...( ماما رجعيهم للبيت) ...>>والله ميب سهلة البنت ههه
غادة : لا والله ما تدرين ان الطلعة عشاننا انتي اللي بترجعين ...
جنا منقهرة من غادة : اووووف انتي اثلا عبية وماما تكلهك لانك بيبي (انتي اصلا غبية وماما تكرهك لانك بيبي
نهى وغادة يضحكون عليها ,نهى: شوفي من يتكلم بس هههههههه...
جنا : ماما ثوفييهم ...
نورة: خلاص يا بنات خلو البنية في حالها...
سكتوا غادة ونهى ... وعم الهدوء السيارة لحد ما وصلو ...
:+: في المجمع :+:
نورة : يلله أي مطعم مشتهين ؟؟؟
بدا الهواش والصراع بين الاخوات حول اختيار المطعم ... نورة ندمـــت انها طرحت السؤال فقالت بحزم : انا الغلطانة اللي اسألكم يالله قدامي اشوف انا اللي باختار ...
غادة : كله من هالبزر ...
جنا : انا ما ثويت ثي ...
نهى انزعجت من اخواتها وقالت محاولة اهدائهما : يكفي تكفون خلاص كلنا غلطانين ...
فصمتت كل من جنا وغادة ... >> مساكين خافوا ...
:^:^:^:^:^:^:^:^:^:^:^:^:^:^:
:+: في المنزل :+:
ام محمد (الجدة ) كانت في غرفتها تصلي الظهر فاذا بجنا تقف بجانبها وتنظر اليها وتحاول تطبيق ما تفعله الجدة
وعندما انتهت الجدة من الصلاة ... التفتت الى جنا التي كانت مندمجة في مراقبة النملة التي امامها باستغراب وتقول لجدتها : ماما ليش النملة ما تتكلم معي ؟؟؟
الجدة : ههههه وانتي ليش تبينها تتكلم معك ؟؟؟
جنا : عثان ابيها تثيل ثديقتي ...(عشان ابيها تصير صديقتي)
الجدة : ليش تبينها تصير صديقتك ؟؟؟
فاجابت جنا بحزن : عثان انا ما احب ثديقاتي ( عشان انا ما احب صديقاتي ) ...
الجدة : ليه حبيبتي ؟؟؟
فانزلت جنا رأسها بحزن واجابت : كلهم عندهم ابو بث انا بابا ما يحبني راح وحلاني (كلهم عندهم ابو بس انا بابا ما يحبني راح وخلاني)...
الجدة : لا حبيبيتي بابا يحبك وصديقاتك بعد يحبونك وكلناااا نحبك ..... وضمت حفيدتها بحنااان ... حنان الجدة والابو اللي انحرمت منه قبل لا تنولد وانحرمت من انها تنطق كلمة (بابا) ... الجدة تحب بنات بنتها بس جنا بشكل خااااص ومتعلقة فيها كثيييير ... :

انتهى ... الجزء الاول او الذكرى الاولى هاه عاد لاتبخلون علي بردودكم قولوا لي:yes: ولا:no: مستنية ردودكم على احر من الجمر

[L'ISA]

بانتظار الذكرى الثانية...

[همس الزهور]

شكرا لك على مرورك الكريم لكن ماراح اكملها الا اذا شفت ردود وتفاعل اكثر لكن عالعموم هذي
+:الذكرى الثانية:+:
رجعو البيت وكان خالهم منصور جالس مع ام محمد في الصالة ...
نورة : يا هلا والله تو ما نور البيت يا ابو احمد ..
منصور : منورباهله والله ...
جنا دخلت عرض: حالي انا ذعلانه عليك
منصور : افااا ليش حبيبتي ؟؟
جا : تسلم عليهم كلهم وانا ما تثلم علي !!!
منصور : ولا يهمك الحين اوديك للمكان اللي تبين بس عشان ترضين علي
نورة : لا يا منصور لا تكلف على عمرك توها لاعبة ومستانسة ..
منصور : لا هذي جنا الغالية من يقدر يزعلها ....
نورة : خلاص اجل جنا روحي قولي لوحده من اخواتك تلبسك ..
جنا : انثاااالله
منصور : الا وين البنات ما شفتهم ؟؟
نورة : المطافيق ما صدقوا يشترون ملابس... اكيد يتقيسون فيها ..جنا روحي ناديهم
منصور : اقول نورة عندي موضوع بعد صلاة العصر انشالله ...
نورة : انشالله ..
:+::+:+:+:+:+:+:+:+:+:+:+:+:+:
...في غرفة البنات...
غادة : امووووت واعرف خالي وش بيقول لأمي !!!
نهى : وانا اكثر والله ... يعني موب عوايده يكلم امي بلحالها ...
غادة : هههههه دايما المحاضرات تشتغل ...
نهى : طيب انا لازم اعرف السالفة فكري معي شلون نسمع السالفة دون ما احد يدري ...
غادة : ما يبي لها تفكير .. دريشة المجلس منكسرة نتوزى وراها ولا احد بيحس ...
نهى : ايه والله فكرة ... بس شلون انكسرت ؟؟؟
غادة : سلطان المطفوق كسرها بكورته ...
رن التلفون..
نورة : مها تبيك على التلفون ..
غادة : اشالله يمه ...
غادة: هلاااا والله بالمها ..
مها : هييي ترا مالي دخل سلطان يبيك ...
غادة : طيب اعصابك .. عطيني اياه ..
سلطان : اهلين غادة شلونك ؟؟
غادة : والله تمام ..
سلطان : كنت بأسألكم اذا بتجون تلعبون معنا اليوم ولا لا ؟؟
غادة : لحظة باسال نهى ...
غادة : هاه نروح اليوم ولا لا ؟؟
نهى : ايه والله اني طفشانة قولي له ايه ..
غادة : طيب بنجي بس اذا صديق ناصر بيجي لا ..
سلطان : لا لا لا محمد موب جاي لا تخافين ..
غادة : طيب ربع ساعة ونجي ..
:+:+:+:+:+:+:+:+:+:+:+:+:+:+:
سلطان ولد جيرانهم عمره 16 تقدرون تقولون معجب بغادة ..
اخوه ناصر عمره 17 ..وصديقه محمد لسانه طويل شوي ومسبب ازمة عندالبنات ...
مها اختهم الصغيرة ... عمرها 12 كبر غادة ...بس انها بثرة شوي ...
ونهى وغادة صايرين يروحون يلعبون مع العيال كورة>>عربجيات هههه طبعا امهم ما تدري عن هالشي..
:+:+:+:+:+:+:+:+:+:+:+:+:+:
في الصالة
نورة : قلت لا يعني لا ...
نهى : يمه والله ما نتأخر بعدين سارة بنت عمهم فيه يمه تكفيييييين ...
نورة : طيب خلاص ازعجتوني روحوا بس قبل 9 تكونون في البيت ...
نهى حبت راس امها ونقزت هي وغادة عند الجيران...
:+:+:+:+:+:+:+:+:+:+:+:+:+:
سلطان : الحين شلون سارة وين ؟؟
مها : يا اخي قلت لك واله الحين بتجي ...
سلطان : ياااا ويلك لو جو نهى وغادةو سوير ما بعد جت ...
مها : اووووف يا اخي فهمت لا تعيد كلاك ترا افقد احترامي لك ....
سلطان : الشرهه ميب عليك علي انا اللي واقف اكلمك ...
دخلو نهى وغادة لبيت جيرانهم وراحوا للصالة >>> يمونون
وسمعو سلطان يصارخ على مها ...
دخل سلطان الصالة وشاف البنات واستحى انهم سمعو صراخه ...
سلطان (بتوتر) :هلا بنات شخباركم ؟؟
غادة : الحمدلله تمام ...
مها : قال بنااات ما قال غادة بلحالها ...
غادة في نفسها (استغفر الله على ثقل الدم ): عادي انا ونهى واحد ...
مها (تكلم بالتلفون): ايه .... طيب ..احسن يستاهلون زي ما يقهروني ....ههههههه ايه عادي عادي ... يالله باي
سلطان :مين تكلمين ؟؟
مها : سارة بنت عمي وتقول انها مهيب جايه الحين
نهى : اذا سارة ميب جاية بنروح لبيتنا ....
سلطان : لا لا وين تو الناس...
غادة تكلم نهى بصوت واطي : الله يفشلك ... ليش قلتي كذا اقول اركدي واقعدي عشان وجهي الصبوحي >> تنكت البنت...
نهى (ترقع): هههههه طيب بكلم سارة وبشوف .... ممكن تدق لي سلطان؟؟
سلطان بوناسة: اكيـــــــد
كلمت نهى سارة ..
نهى : شلون يعني منتيب جاية ؟؟
سارة : يا اختي بجي بس يبيلي ساعة ونص كذا ..
نهى : يا سلااااااام بنقعد بلحالنا مع العيال ساعة ونص يعني !!!!
سارة : اقول غادة قدها وقدود انتي بس هزي راسك وسوي اللي تقوله ...
نهى : ليش انشالله شايفتني طرطورة اهز راسي كل ماقالت شي ...
سارة : اجل بتسولفين معه يعني ؟؟؟
نهى : لا لا خلاص اهز راسي ....
(نهى تستحي شوي بعكس غادة اللي ماشالله لسانها يلوط اذانها )
نتعرف على سارة .........
سارة بنت عم سلطان ... عمرها 14 بس مـــره علاقتها حلوة بنهى وغادة ه معهم في نفس المدرسة ...
:+:+:+:+:+:+:+:+:+:+:+:+:+:+:+ :+:
في بيت نورة... وتحديدا في المجلس ........
نورة : خوفتني يا منصور ... قل وريحني
منصور : انتي ماشالله عليك كبرتي وربيتي حريم الله يحفظهم ... وانتي توك صغيرة ومن حقك تعيشين ..
قاطعته : اعتقد تناقشنا في هالموضوع قبل وانت عارف رايي ...
منصور : بس هذا شي من حقك ...
نورة : انا رافضة الفكرة .... بعدين الحين البنات كبروا ويفهمون واي خطوة بتخذها لازم يكون لهم راي فيها ....
منصور : اذا البنات خليهم علي .... بس المهم اوعديني تفكرين في الموضوع ... بس ترا ما سألتي عن اللي خاطبك ؟
نورة طالعته بزعل ودلع >>> تتدلع بعد : موب لازم اعرف لاني ما وافقت على الفكرة اساسا ...
منصور بابتسامة: لا انشالله بتوافقين ......
نورة : انا ما اوعدك ...
مصور : دام رديتي لا انشالله بتفكرين ........ المهم انا استأذن الحين بروح ارتاح قبل ما اروح لشغلي سلمي لي على البنات ...
نورة : يوصل انشالله ...
:+:+:+:+:+:+:+:+:+:+:+:+:+:+:+ :+:+:+:
وش تتوقعون ردة فعل البنات اذا عرفو عن الموضوع ؟؟؟
ونورة بتفكر بالموضوع او بتتجاهله زي كل مرة

[shy kat]

سلموووووووووووووووووو على القصه الحلوه
نستنى الذكرى الثالثه باحر من الجمر
:yes: :yes: :yes: الى الامام عزيزتي ;)

[L'ISA]

أختي ما رأيك ان تكتبي أكثر من ذكرى، لتتكون صورة أكثر وضوحا للقراء!!

وتكتمل الأحداث تقريبا!

بانتظار الذكرى الثالثة!

[lornsa]

الجريح:ايه كملي تكفين مره حلوه:) :) :cry:

[lornsa]

الجريح:ايه كملي تكفين مره حلوه:) :) : تكفين ترى بصيح:cry: :cry:

[همس الزهور]

نا اسفة جدا لان المنتدى الي كنت اجيب منه القصة اغلق لكن بحاول لخاطر عيونكم اني القاها وفي هالوقت مرو على مشاركتي وقصتي وهي احلى بكثير من هذي وعندي اياها كاملة ومرة ثانية الف شكر على مروركم وردودكم

[همس الزهور]

انا اسفة مرة وبعد مستحية منكم لاني والله دورتها مالقيتها لان المنتدى اللي كنت انقلها منه اغلق لكن ما بياس راح ادورها وفي هالوقت مرو على على قصتي واكرموني بمروركم وردودكم تراها وايد حلوه ( انا شكيت من الهوى.....)
يالله عاد القوا عليها نظرة ولا تزعلون مني ويالجريح لا تصيح والله بادورهاا لك

[L'ISA]

ما صار شي..

انا كمان بساعدك بالبحث!

مشكورة على كل!

[العبقرية]

مرســــــــــــــــــــي