اول شي عدم الثقه - ثاني شي.....؟!؟

[هلا]

مرحبا...

أول شي ودي اقوله اني مره كنت اتطمش على منتديات الأسهم ولقيت الناس في هرج ومرج وش أشتري ووش

أبيع ... ولقيت ان فيه واحد مبين من الاسلوب انه فويهم في موضوع الاسهم لأنه متفلسف وقاعد ينقل الأخبار

ويعطي رايه والكل فازع به .....

المهم جا واحد مسيكين وقال انه بيشتري في الشركه الفلانيه وانها يتوقع لها وكلام من دا

قام أخينا بالله ... رد عليه وقاله لا لا لاتشتري في هذي الشركه انه الخبراء يقولون ويقولون والتوقعات في تدهور

واشتر لك في الشركه العلانيه .... الشركه العلانيه هذي زلابه شهيره اي نعم بس ماتنفع بالتداول اليومي ...هذا

الموضوع قديم المهم رحت لمؤشرات الأسهم حقت الشركتين

المسكين اللي كان يسأ عن شركه وصلت الشركه اللي كان يبغاها من 11 دولار إلى 18 دولار يعني هنا مابعده

هنا .... والشركه اللي اخينا نصحه فيها .... كانت بـ 24 ـ ونزلت إلى 17 وكسور يعني خراب بيوت

.....

العبر من هذا الموضوع اللي شفته انك ابد ابدا ماتسمع نصايح بالبيع والشرا الا من الخبراء اللي تشترك معهم في شركاتهم ويرسلون لك نشرات هذي أولا

ولا تثق بالناس اللي ينصحونك باليع والشراء كذا لأن ماتدري وش مصلحتهم ....

ثاني شي لا تثق بالشركات اللي ما يكونون بالسوق أقل من 5 سنين لأنهم ممكن يكونون نصابين ويطقون الدراهم

وينحاشون ...

طبعا انتم عارفين عن الشركه السعودية اللي اعطت قرض لشركة أمريكية أعلنت عن افلاسها ...

والشركه السعوديه طبعا هدفها الربح والربح اللي ماوراه بأي شي قامو أعطوهم القرض بدون ضمانات بدون أي

شي

والنتيجه خسرت الشركة السعودية بعد افلاس الشركة الأمريكية

انا طبعا هنا اتكلم بدون ذكر اسماء

والمطلوب منكم عدم ذكر اسماء الشركات في النادي

والسبب عشان نجنب انفسنا مشاكل ممكن تصير بسبب انا نعيب او نمدح شركه بعينها

واطلب من كل شخص يكتب موضوع عن البورصه يكتبه بصوره عامه

وشكر لكم :)

[أبو ريناد]

مرحبا ببنت نت وهلنادي الرائع ويعطيك ألف عافيه على الفكرة وإتخاذ القرار في الدخول لعالم البورصه والسوق والتوفيق إن شاء الله ومضاعفة رأس المال وأتمنى لك من كل قلبي التوفيق الدائم يارب.

بالنسبه لأخبار الشركات والسوق (( طبعاً الأمريكيه )) أتوقع أن الي يدور النصيحه من المنتديات ياهو غلطان أو ماعندة أي سالفه أو (( وهذا هو الإحتمال الكبير )) أنه قارئ أخبار ومتشبع منها وناوي يشتري هذا إذا مابعد أشترى وخلص ويبي واحد يطمنه أو يقول له الله بالخير وزي ماتجي تجي.

بحكم تجارتي على النت وقبلها في الأسهم السعوديه أتوقع أن العمليه هذي كلها تعتمد على عاملين رئسيين وراح أذكرهم وأذكر نسبه كل واحد منهم.

1- الحظ ويشكل 60%
2- المتابعه والدراسه للشركه الفلانيه ويمثل 40%

هذا حسب توقعاتي أنا والي أكتسبته في التعامل مع الأسهم الأمريكيه وملاحظتي على أن الحظ يشكل أكبر نسبه لأن سوق الإقتصاد الأمريكي أكبر مؤثر له هو الإشاعات والتحليلات والتوقعات.
يعني يجي شايبنا غريسبان ويقول (( أتوقع أننا راح نبيع أجهزة كمبوتر هالعام أكثر من العام السابق بمعدل % )) << وحطي خطين على كلمه أتوقع.
بعد هالتصريح بدقائق أو أول مايفتح السوق نفاجأ بجميع شركات الكمبويتر ومايتعلق بها أو مؤشر نازداك ككل مرتفع وطاير للسماء في هذاك اليوم فقط !!! اليوم الي بعدة رجع لما كان عليه هذا إذا ماخسف فيه الأرض!!

فأتوقع الحظ له نصيب الأسد ,, أما الدراسه الوافيه عن الشركات هي الأساس الي نبني عليه تجارتنا وأقصد بالدراسه أنك تدرسين وضع هالشركه لمدة لاتقل عن 10 سنوات ومعدل نموها وبعض المرات تحتاجين لآله حاسبه !!!

أما للمضاربه والي يبي الربح السريع فأتمنى أن لا يغامر وفي الغالب يربح كثير في الأول ولكن (( مو كل مرة تسلم الجرة )) وأسألوني أنا ,, والي يبي يستثمر أمواله لازم يدرس زين وضع هالشركه والأفضل أنه يبعد عن الشركات الي سعرها أقل من 5 دولار نزولاً.

والمهم جداً الي أتوقع نزلت أختي بنت نت موضوعها علشانه أنه الواحد مافي مانع يشير لشركه معينه كستليط ضوء ولكن أهم شئ يبري ذمته يعني لو يذكر في نهاية موضوعه (( هذة ليست نصيحه للشراء )) ويكون الخيار أمامك أنت تبي تشتري على خبرة إكتسبتها بنفسك ولا تفضل الحياد .

وللمساعدة إن شاء الله راح أذكر مستقبلاً جميع المواقع الي تساعدنا في دراسة الشركات والي تعطيك أكبر مجموعه من الأخبار والتفاصيل (( للأسف طبعاً جميعها باللغة الإنجليزيه )) لتكون بداية من هناك مو من أي أحد سواءً في المنتديات أو غيرها .

مشكورة يالشيخه بنت نت والأكيد أن الكلام يطول ولنا رجعه قريباً وإذا صدتي لك صيدة من هالشركات تكفين لا تبخلين علينا والحلاوة محفوظه بس عطينا من الي عندك خلينا نصييف هالصيف صح هههههههههههه.

[هلا]

هلا فهد

المسألة ومافيها ان كل من دخل السوق على باله انه هو أذكى الخلق وانه هو اللي فاهم وغيره لا

ولكن ثق انه مثل ماهو فاهم الكل بعد فاهم والشركات اللي ترسل لك أخبار وتوقعات السوق ترسل للغير

يعني قصدي بلاش الحرافه اللي مالها سنع وبس

وبلاش يكون النادي وكر للإشاعات الخواره اللت والعجن

وقصدي ان يكون النادي للاخبار ماهو للتعليم بصوره عامه ....

لأن اللي يبي يتعلم عنده الكتب ماليه الدنيا ....مع شوية لغه وانتهى الموضوع

وهذا هو القصد...

وكلامك عن ارتفاع السوق بالإشاعات وسعر الفايده والكلام هذا للي يتداولون يومي ...هذا بيفيدهم

اما اللي يبي يشتري اسهم للمدى البعيد ... فمثل ماتفضلت وقلت يبيله يدرس وضع الشركات اللي يبي يساهم فيها

وترى المسألة ماهي سهله مثل ما يتوقع الكثيرين!؟!

يعني بتطلع كم شيبه على شيبه على ماتحقق الربح

وبتجيك غلقه على غلقتك على ما تحصل لك قرشين :)

والله يوفق الجميع

[ماني فيه]

نعم كلامك صحيح .... بالشيء اللي يخص الثقه بالنفس خاصة بالبيع والشراء

لان اللي يستنصح من ناس لهم خبره بسوق الاسهم بمعني شريطية الاسهم ، عز الله دمار

اما انا:roll: مايمكن اساهم عقب سالفة صارت معي

قبل فتره طرحوا اسهم شركه بدون اسم

المهم ساهمت بخمس طعش سهم

وكل سنه وهم متصلين ماتبي تستلم الارباح ... اقول لا ماني بحاجه خلوها

المهم جلست ثلاث سنوات وانا ما اروح لهم .....

يوم من الايام ... حدتني الدنيا قلت ياولد مالها الا شركتي وانا متعشم بمبلغ

تصدقين كم الارباح اللي يبون يسملوني لخمسة عشر سهم ومدة ثلاث سنوات

احسبيها كذا
3سنوات × 15سهم × 10اللي هو ربح السهم = 450

ومن محاسن الصدف كنت شاري السهم بــ450

قلت مابي ارباح ولا ابي اسهم ابي ابيع قالوا نشتري بـ150:mad:

يعني لا احد يحاول اني اساهم :mad: .... وعلى قولتك لاخسرت الشركه الفلانيه اللي برا
خسر عشرين شركه عندنا ...... واللي يبي يدعي علي يقول فيه اسهم مطروحه للبيع

[شلووواح]

السهم قصه طويله عريضه مالها اول ولا اخر .

هي عمليه اشبه بالابتزاز !! انت تساهم بعشرين اربعين سهم وبعدين كل شوي او بين فتره وفتره يبونك تسدد اقساط مستحقه وعلى مدى سنين وانت تنتظر ارباح ولكن مافيه شي واسهم ماحقق ارباح تنفعك انت لكن حقق ارباح .

المساهمه والرباح ينفرد فيها اشخاص ومؤسسات معينه وانت ياحافظ عيونك طايره تبي القفزه للسهم لعلك تحصل مرادك .
تحياتي ,,,

[ماني فيه]

انك صدقت في كل كلمه وكل حرف كتبته